Skenar destabilizues për të bllokuar finalizimin e reformës në drejtësi dhe hapjen e negociatave me BE-në e ka cilësuar ministri i Brendshëm, Sandër Lleshaj, protestën e djeshme të opozitës.
Ndërsa vlerësoi dhe mbështeti reagimin e Policisë së Shtetit, Lleshaj tha se me profesionalizimin e treguar dje, meritojnë respektin e çdo shqiptari.
Lleshaj tha se përballë atyre që kërkojnë destabilzimin janë organet ligjzbatuese dhe qytetarët shqiptarë.
“Bomba Molotov dhe kapsolla u hodhën gjatë përpjekjeve për të djegur institucionet. Flakët dhe goditjet rrezikuan seriozisht punonjësit e policisë.
Ata burra e gra meritojnë respekt dhe vlerësim.
Për orë të tëra përballuan qindra bomba molotov e qindra mjete të tjera.
Dhe ata që u angazhuan në ndalimin e Sahit Dollapit, të kishin bërë diçka ndryshe. Të kishin duruar dhe pak sekonda në ndalimin e personit në fjalë…
Por nuk mund të justifikohet histeria e zjarrit që u derdh mbi institucionet.
U bëj thirrje të gjithëve për reflektim të thellë ndaj përpjekjeve për destabilizim”, tha Lleshaj.
Sipas tij, dje u rrezikua seriozisht jeta e punonjësve dhe dhjetëra punonjës përfunduan në spital për shkak të plagëve të marra.
“Fakti që ideatorët e sulmeve janë të njëjtin persona që kanë prodhuar për këtë vend tragjedi ë mëdha meriton vëmendje të ndjeshme.
Ata që mbronin me qetësi kriminale vrasjen e 4 protestuesve dhe plagosjen e të tjerëve në 2011, i lejojnë sot të drejtën vetes të japin leksione demokracie.
Qeveria shqiptare dhe Ministria e Brendshme e mbështesim plotësisht Policinë e Shtetit për ruajtjen e rendit.
Organet kompetente do të marrin masa ligjore për të vënë para përgjegjësisë ata që organizuan dhe vunë në rrezik institucionet e shtetit”, tha ai.
