Nga Boldnews.al
Kryeministri Edi Rama e mohoi që t’i ketë kërkuar Kryeprokurores së Përkohshme, Arta Marku, që hetimet për qytetarët protestues t’i zhvillojë Prokuroria për Krime të Rënda.
Në një konferencë për median, të zhvilluar mesditën e së Enjtes, ai u detyrua të pranojë se ka thirrur Arta Markun në një takim të panjoftuar, vetëm pasi disa foto u publikuan fillimisht nga “Boldnews.al”.
Sipas kryeministri, ai ka thirrur Markun, si edhe drejtues të institucioneve të tjera ligjzbatuese, për t’i vënë në dijeni se ai është i vendosur për sigurimin e rendit kushtetues.
Në fakt, duhet të kishte ndodhur e kundërta. Pra, që institucionet ligjzbatuese të informonin Kryeministrin, pasi të kishin informuar më parë Presidentin, për të dhëna që krijojnë dyshime se mund të cënohet rendi kushtetues.
Por, institucionet ligjzbatuese duket se nuk kanë informata të tilla dhe drejtuesit e tyre janë detyruar të dëgjojnë se çfarë informacionesh ka Kryeministri (ku i gjeti!?!) për cënimin e rendit kushtetues.
Burime mediatike deklaruan gjatë paradites se Edi Rama i ka kërkuar Arta Markut që protestuesit të hetohen nga Prokuroria për Krime të Rënda, e drejtuar nga Donika Prela. Kryeministri e mohoi diçka të tillë, pavarësisht se dëshmoi vështirësi për të dhëna argumentet kundër.
Gjithësesi, të vërtetën e plotë e dinë ata që ishin në takim. Por, edhe nëse Edi Rama do të kishte kërkuar që hetimet të ndiqen nga Donika Prela, nuk është fare pa sens.
Edi Rama e di shumë mirë që hetimi në duart e Donika Prelës do të jetë, në çdo rast, në favor të tij. Shefja e paligjshme e Krimeve të Rënda ka dhënë prova se ajo, jo vetëm nuk guxon të nisë hetime për zyrtarët e maxhorancës, por, përkundrazi, është e gatshme të penalizojë çdo qëndrim opozitar që cënon pushtetin e Partisë Socialiste.
Provat janë të shumta dhe domethënëse.
– Nën drejtimin e Donika Prelës, Saimir Tahiri, ish-ministri kampion i Punëve të Brendshme në kabinetin “Rama 1” po hetohet për akuza shumë të rënda, në gjendje të lirë. Natyrisht, mbështetësit e Prelës mund të argumentojnë se është gjykata ajo që nuk ka vendosur masë ndaj Tahirit. Kjo është e vërtetë, siç ështe e vërtetë se gjykata fillimisht vendosi masë sigurimi ndaj tij. Por, pasi u konstatua se Donika Prela ishte një “vartëse” e qeverisë, edhe gjykiata, nën darën e Vetingut, preferoi të mbante anën e më të fortit, pushtetit.
– Donika Prela dhe prokuria e saj as nuk mori mundimin të hetonte Agron (Geron) Xhafaj, vëllain ish-ministrit të Brendshëm, Fatmir Xhafaj, i akuzuar nga një ish-bashkëpunëtor i tij, për vijimin e trafikut të narkotikëve. Përkundrazi, Donika Prela, nën dirigjimin e Arta Markut, vendosi të penalizonte denoncuesit.
– Donika Prela, nën urdhërimin e Arta Markut, është shndërruar në digë të dosjes “339”, në të cilën gjenden përgjime ndërmjet bashkëpunëtorëve të ngushtë të Edi Ramës me anëtarë të grupeve kriminale, ku disktohet për vjedhje e blerje votash.
– Shefja e Krimeve të Rënda ka dëshmuar se është bllokadë e rëndësishme për vijimin e hetimeve për dosjen “184”, në të cilën zyrtarë shumë të lartë qeveritarë, rezultojnë të përfshirë në trafik votash në zgjedhjet e Dibrës.
– Donika Prela nuk ka aspak ndërmend që të nisë hetimet për Damian Gjiknurin, lidhur me aferën e Unazës së Re. Për këtë çështje ka një hetim të nisur nga Prokuroria e Tiranës, i cili po merret me “peshqit e vegjël”. Damian Gjiknuri, për shkak të pozicionit të tij, hetohet nga Prokuroria për Krime të Rënda, në rast se Donika Prela dhe Arta Marku do të kishin vullnet të zbardhnin skandalin e Unazës së Re.
Këto raste, por edhe plotë të tjera më minore, janë një arsye e mirë se përse Donika Prela do të ishte zgjidhja ideale për të përmbushur dëshirat e Edi Ramës në aspektin penal.
