Ministri i Punëve të Jashtme në detyrë, Gent Cakaj, e ka trajtuar si një kërcënim për Ambasadorin dhe familjen e tij, mesazhin që i është përcjellë Bernd Borchardt nga qytetarët e Tiranës ku shkruhet “Turp t’ju vijë”.
Mesazhi është shkruar në hyrjen e pallatit ku jeton Borchardt, i cili një ditë më parë doli me një deklaratë ndaj protestës së thirrur nga opozita, por e ndryshoi atë brenda pak minutash, duke tentuar të shpërndajë përgjegjësinë për dhunën.
Cakaj thekson se sulmi ndaj banesës së ambasadorit të OSBE-së është sulm primitiv dhe akt kriminal. Ministri i Jashtëm në detyrë e quan si hakmarrje primitive këtë gjest të opozitës.
“Mjaft është mjaft! Sulmi i mbrëmshëm ndaj shtëpisë të Ambasadorit të OSBE-së në Shqipëri, Bernd Borchardt, pas deklaratës publike të OSBE kundër dhunës kriminale në protestën e djeshme, përbën një tjetër akt të papranueshëm kriminal.
Veprimi është kryer në urdhëra të qarta politike të krerëve të protestës me qëllim frikësimin e Ambasadorit Borchardt dhe familjes së tij, si hakmarrje primitive e atyre që pasi kanë humbur kontrollin e vetes duan të nxjerrin nga kontrolli rendin kushtetues të Shqipërisë!
Ambasadori Borchardt vazhdimisht ka kryer punën e tij me profesionalizëm të plotë në kuadër të Misionit të OSBE-së dhe faji i tij i vetëm është thirrja fisnike për frenim nga dhuna dhe distancim nga veprimtaria e dhunshme. Sulmi ndaj tij është sulm ndaj themeleve të kulturës demokratike, imazhit ndërkombëtar të Shqipërisë dhe përpjekje e drejtpërdrejte për ta cenuar besueshmërinë e Shqipërisë për kryesimin e OSBE-së 2020. Kjo nuk është thjeshtë Shqipëria që duam: kjo nuk është kurrësesi as Shqipëria e tanishme.
Kjo është Shqipëria e një grupi rrugëhumburish politik dhe huliganë kriminalë si ata që kryejnë akte dhune dhe që kanë dhunuar edhe banesën e ambasadorit
Për më shumë, kultura e liçimit masiv, diskreditimit tendencioz profesional dhe cenimit personal është krim në vetvete. Ndaj, secili person me përgjegjësi minimale shoqërore duhet menjëherë të distancohet nga sulmi kriminal ndaj Ambasadorit Borchardt dhe të dënojë veprimtarinë e dhunshme kundër Shqipërisë në përgjithësi”, thekson Cakaj.
