Një protestues në Berat ka dalë në protestën e thirrur nga opozita me listën e borxheve në dorë. Ai thotë se është i sëmurë dhe se me lekët e pensionit ka larë borxhet e nuk ka mundur të blejë dot ilaçet.
“Ti nuk di të udhëheqësh. Ta marrësh pushtetin shumë lehtë është por…Unë jam i sëmurë, s’kam lekë të marr ilaçet. Lava borxhet, me një pension 127 mijë lekë. Si të mos protestoj unë këtu. Ky është sovrani?”, u shpreh protestuesi.
Kjo është protesta e dytë në formën e mosbindjes civile e thirrur nga opozita, e cila një javë më parë bllokoi për 60 minuta 5 akse kryesore të vendit. Opozita e bashkuar kërkon largimin e kryeministrit Edi Rama dhe krijimin e një qeverie tranzitore për garantimin e zgjedhjeve të lira e të ndershme. Protestat që po zhvillohen në 12 qarqe të vendit kanë nisur që prej orës 18:00 dhe parashikohen të mbyllen në orën 20:00. /bn/
