Familja e Admir Muratajt ka paditur Policinë e Shtetit lidhur me vrasjen e këtij të fundit në datën 9 prill, teksa ai dhe 4 persona të tjerë po largoheshin pas grabitjes së kryer në pistën e aeroportit “Nënë Tereza”.
Padia është ngritur nga vajza e 47-vjeçarit Murataj, përmes avokatit Arbër Hoxhaj.
Ajo ka kallëzuar penalisht në Prokurori punonjësit e FNSH-së për vrasjen e babait të saj.
“Policia duhej t’a arrestonte Admir Muratajn dhe jo ta vriste”, thotë avokati i familjes së viktimës, ndërsa padia penale është bërë ndaj punonjësve të FNSH-së që morën pjesë në operacionin ndaj grabitësve.
Nga akt-ekspertiza e publikuar një ditë më parë, rezulton se Murataj është qëlluar në pjesën e kokës me një plumb, ndërsa nuk është përcaktuar se nga kush është qëlluar, policia apo shokët e tij.
Një furgon me efektivë të FNSH u vu në ndjekje të furgonit ku ndodheshin grabitësit pak minuta pasi ato në mënyrë spektakolare grabitën disa thasë me para, që po transportortoheshin drejt një avioni, me destinacion Vjenën.
Mes policisë dhe grabitësve është raportuar se ka pasur shkëmbim zjarri, ndërsa viktimë ka mbetur Admir Murataj.
Ky i fundit është identifikuar nga familjarët e tij, ndërsa nga ajo çfarë është raportuar mjeku ligjor nuk ka firmosur akt-ekspertizën, ndërsa pritet përgjigjia e analizave të ADN.
