Skënderbeu fitoi me shifrat 2-0 ditën e djeshme sfidën e javës së 31-të në Korçë ndaj Flamurtarit, ndërkohë “Panorama Sport” ju sjell momentet më pikante nga ky takim.
– Afro 3000 të pranishëm në stadiumin “Skënderbeu” për të parë ndeshjen përmbyllëse të javës së 31-të. Pati atmosferë në ditën e Pashkëve, edhe pse u kalua masa me të shara. Dhe lojtari më i shënjestruar prej vendësve ishte Idriz Batha.
– Të dyja “delegacionet” e ekipeve kanë qenë prezente në stadium për të ndjekur takimin, por në fund i buzëqeshur u largua Ardjan Takaj.
– Shehi dhe Daja janë përshëndetur në fillim të takimit dhe më pas secili ka vijuar udhëzimet për ekipin e tij. Shehi ka kërkuar më shumë shpejtësi në mbylljen e aksioneve, ndërsa Daja nga ana e tij udhëzonte lojtarët për respektim të detyrave dhe përqendrim në reparte të ndryshme të lojës.
– Gjergj Muzaka duhet të luante me maskë dhe atë e kishte në dorë. Megjithatë nuk mundi që ta mbante gjatë dhe e hoqi pas 5 minutash, pasi e pengonte.
– Franc Veliu ishte llogaritur si titullar në qendër të mbrojtjes nga Ilir Daja, por gripi dhe temperatura i prishën planet. Lojtari e kishte gdhirë, ndaj edhe në momentin e fundit trajneri sajoi mbrojtjen.
– Toleranca fetare në Shqipëri, “fle” më mirë se në çdo vend tjetër. Kështu ngjau edhe dje në Korçë. Në ditën e Pashkëve ortodokse, Blerim Krasniqi shënoi gol dhe festoi me ritet e besimit mysliman.
– Tifozët kanë shprehur edhe një herë simpatinë e tyre karshi trajnerit që fitoi gjithçka në Korçë. Ata e kanë përshëndetur gjatë Ilir Dajën, ndërsa nuk ka munguar as ndonjë thumbim në distancë nga tribuna pas krahëve të pankinës mike. Me raste të veçanta, tifozët i kanë kujtuar trajnerit të Flamurtarit se vetëm në Korçë merren lekët e caktuara në kontratë dhe se vetëm me Skënderbeun dilet kampion dhe ecet në Europë.
– Ilir Daja në fund të takimit është takuar me përzemërsi me Bajram Jashanicën.
– Një nga punonjësit e kryqit të kuq që kishte për detyrë të drejtonte barelën e ka pësuar keq. Në momentin kur Sibo do të dilte i dëmtuar nga fusha, ai është rrëzuar në tokë dhe ka përdredhur këmbën. Në fund, ai është parë duke çaluar.
