“Koalicioni opozitar po vepron në sinergji të plotë”, deklaroi këtë të hënë Lulzim Basha, pasi aleatët e PD-së prezantuan më herët një marrëveshje për të dalë nga kriza politike.
“PD ka përfunduar një dokument javën e kaluar të detajuar për detyrat e qeverisë tranzitore në raport me zgjedhje të lira e të ndershme dhe do ta paraqesë në ditët në vijim në mënyrë publike. E kemi diskutuar edhe me aleatët tanë dhe një pjesë e pikave që kanë shpalosur aleatët janë edhe një pjesë e pikave e programit tonë. Ka një përputhje totale, të jeni të sigurt se koalicioni opozitar po vepron me bashkëpunim, mirëkuptim dhe sinergji të plotë”, tha kreu i PD-së duke iu përgjigjur interesit të gazetarëve.
Lulzim Basha përsëriti se kualicioni opozitar do të përfshihet në zgjedhje “kur të ketë zgjedhje të lira e të ndershme”. “Kushti i padiskutueshëm mbetet largimi i Edi Ramës dhe krijimi i një qeverie tranzitore”, shtoi kreu i opozitës.
Pas takimit me përfaqësues të Institutit Ndërkombëtar Republikan, Basha foli edhe për nismën e PD-së për të zgjedhur kandidatët për deputetë në zgjedhjet e ardhshme parlamentare, me parimin një anëtar një votë. Me këtë mënyrë, u shpreh, përfitojnë qytetarët shqiptarë.
Jemi në një betejë ‘jetë a vdekje’ për demokracinë, theksoi ai.
“Po avancojmë në rrugën tonë për demokratizimin e PD-së. Sot diskutuam me ekspertë nga Uashingtoni. PD do t’i zgjedhë deputetët me sistemin një ‘anëtar 1 votë’. Është një model perëndimor. Do bëjmë një transformim të skenës politike shqiptare. Do përfitojnë qytetarët shqiptar. Është një standard i paprekur në 30 vite tranzicion. Jemi në një betejë ‘jetë a vdekje’ për demokracinë, por kjo se pengon PD-në të përgatitet për përgjegjësitë për të ardhmen. Zgjedhja e deputetëve me parimin ‘1 anëtar 1 votë’ jep garanci se qeverisja e nesërme do t’i shërbejë qytetarëve dhe jo interesave të krimit të oligarkëve që ka marrë peng qeverinë”. /BN/
https://www.facebook.com/lulzimbasha.al/videos/275964036691491/
