Aleatët e PD-së paraqitën këtë të hënë një platformë për një marrëveshje mes të gjitha palëve politike për nxjerrjen e vendit nga kriza. PR, PAA, PBDNJ, LZHK, PDK ishin partitë që propozuan realizimin e një marrëveshjeje, që parashikon disa kushte, të cilat i renditi Sekretarja e Marrëdhënieve me Publikun në PR, Aida Shtino, në një konferencë për mediat.
Kushtet
Thirrja e një tryeze nga presidenti mes opozitës dhe mazhorancës.
Tryeza të vlerësojë kushtet e OSBE për përcaktimin e datës për zgjedhjet parlamentare dhe lokale.
Reformë zgjedhore që ndalon angazhimin e paligjshëm në zgjedhje.
Kthimi i parlamentit në përfaqësues dhe lista të hapura ku qytetarët të zgjedhin deputetin që i përfaqëson.
Vlerësimi i kuadrit kushtues të vendit për të mundësuar bashkëpunimin me një vlerësim të drejtë të reformës në drejtësi që është funksionimi i Gjykatës Kushtetuese dhe Gjykatës së Lartë, qoftë dhe me një amendament të përkohshëm.
Kufizim i mandatit për Kryeministrin dhe deputetët.
Test droge për Presidentin dhe Kryeministrin.
Presidenti të zgjidhet nga populli.
Parlamenti i ndarë në dy dhoma, senat dhe dhomën e përfaqësuese.
Rishikimi i formës administrative për ta çuar pushtetin sa më pranë njerëzve.
Kreu i PR-së Fatmir Mediu u shpreh se duhet një marrëveshje e politikes shqiptare dhe jo Basha-Rama. Ndërsa kryetari i PAA-së Duka tha se ata nuk hyjnë në zgjedhje pa një qeveri kalimtare.
Kreu i PDK-së Nard Nokoa tha se në tryezë le të jetë edhe kryeministri Edi Rama dhe të paraqesë qëndrimin për daljen nga kriza.
“Rama le të ulet në tryezë, dialogu dihet të vazhdojë, përgjegjësia e kësaj krize është e kryeministrit, pavarësisht se është ai shkaktari dhe s’mund ta zgjidhi. Presidenti ka autoritetit të thërrasë të gjitha partitë. Të dëgjohen të gjitha partitë, të dëgjojmë dhe zotin Rama përtej batutave”, tha Ndoka. /bn/
