Një ngjarje e rëndë tronditi mbrëmjen e sotme qytetin e Laçit, ku dy grupe të rinjsh janë përplasur me armë zjarri në qendër të qytetit.
Ngjarja ka ndodhur rreth orës 20:10 të ditës së diel. Në media fillimisht u raportua për një të vdekur gjatë shkëmbimit të zjarrit dhe një tjetër të plagosur rëndë i cili u nis menjëherë drejt spitalit.
Dy personat të cilët kanë ndërruar jetë janë pjesëtarë të familjes Jushi në Laç. Mikel Jushi 35 vjeç dhe Jani Jushi 30 vjeç kanë mbetur të vrarë pas shkëmbimit me armë zjarri mbrëmjen e sotme.
Menjëherë pas ngjarjes policia raportoi se dy personat që humbën jetën kanë mbetur të plagosur rëndë dhe janë dërguar në spitalin e Traumës në Tirane.
Njoftimi i policisë:
Sot rreth orës 20:15 në lagjen nr. 1 Laç, afer një lokali ka patur të shtëna me armë zjarri.
Për pasojë dyshohet se kanë mbetur te plagosur 2 shtetas, M.J dhe J.J., të cilët janë dërguar në gjendje te rëndë për jetën në Tiranë për ndihme mjekësore.
Në vendngjarje mbërritën shërbimet e Rendit dhe të Policisë Kriminale, që kanë nisur punën për zbardhjen e rrethanave të ngjarjes, identifikimin e autorëve dhe përpalljen e tyre me drejtësinë.
Disa shërbime të tjera policore kanë ngritur pika kontrolli dhe po vijon shoqërimi i personave që mund të kenë dijeni për rrethanat e ngjarjes.
Për shkak të hetimit nuk mund të bëhen publike të tjera detaje qe lidhen me ngjarjen.
Menjëherë pas këtij lajmi, burime nga policia thanë për Boldnews, se dy personat e plagosur kanë ndërruar jetë si pasojë e plagëve të marra.
Ndërkohë që pas dëshmive të marra thuhet se vrasja ka ndodhur për shkak të një konflikti banal mes vrasësit dhe viktimave, si dhe njëri prej të rinjve ka humbur jetën në vend.
Sipas dëshmive fillimisht sherri verbal ka nisur brenda ambienteve të një lokali mes të rinjve dhe më pas ka degjeneruar në përplasje me armë pasi kanë lënë ambientet e tij.
Policia ka shoqëruar në komisariat disa prej dëshmitarëve kularë dhe pas dëshmive të marra ka shpallur në kërkim autorin e ngjarjes. /Boldnews.al
