Bindja Demokratike është regjistruar sot si parti. Vendimi është dhënë nga Gjykata Administrative në Tiranë, ndërsa kërkesa ishte depozituar dy ditë më parë.
Në këtë mënyrë ‘Bindjes Demokratike” i hapet rruga për t’u regjistruar dhe për të marrë pjesë në zgjedhjet vendore të 30 qershorit, ashtu sikundër ka deklaruar edhe kreu i saj, Astrit Patozi.
Patozi ka deklaruar se Bindja Demokratike do të jetë një parti opozitare, ndërsa është shprehur se në bindjen e tij, opozita në tërësi duhet të marrë pjesë në zgjedhje.
Bindja Demokratike depozitoi në gjykatë 4 mijë firma, ndërsa në bordin drejtues të saj janë disa prej emrave që kanë qenë pjesë e PD-së. Kështu në bord bëjnë pjesë Arben Skënderi, Leonard Olli, Valbona Mezini dhe Fabian Topollaj.
