Drejtuesit e partive opozitare janë shpërndarë në zonat ku do të bllokohen akset kryesore kombëtare.
Protesta që nis njëkohësisht në orën 18:00 do të bllokojë rrethrrotullimin e Bradasheshit, aksi kryesor i hyrjes nga Shqipëria lindore, në Durrës në autostradën Plepa-Kavajë, në Milot, karburanti në autostradë, aksi kryesor nga Shqipëria e Veriut, në Fier, rrotullimi i Sheqit dhe në Tiranë rrethrrotullimi i Shqiponjës.
Sikundër raportohet në Tiranë do të jetë nënkryetari i PD-së, Edi Paloka, si dhe ish-deputetët, Petrit Vasili, Klajda Gjosha dhe Floida Kerpaci (LSI) dhe Jorida Tabaku, Albana Vokshi, etj nga PD.
Ndërkohë kreu demokrat, Lulzim Basha, ka zgjedhur për të qenë prezent në Milot, ndërsa nga LSI do të jenë prezent Viktor Tushaj, Perparim Spahiu dhe Agron Celasi.
Në Elbasan, është angazhuar kreu i PDIU-së, Shpëtim Idrizi, dhe nënkryetari i PD-së, Edmond Spaho.
Kryetarja e LSI-së Monika Kryemadhi, sekretari i Pergjithshem Endrit Braimllari, si dhe ish-deputetë të PD-së dhe LSI do të jenë në Durrës.
Ndërsa në Fier është i pranishëm ish-deputeti Enkelejd Alibeaj dhe nga LSI, Kejdi Mehmetaj.
Policia po monitoron situatën me efektivë të rrugores dhe komisariateve që mbulojnë zonën.
