Nga Boldnews.al
“Jam 28 vjeç, por kam 14 vite karrierë politike”… Ai goditi fort me këtë shprehje. Llogaritë nuk të dalin, por këmbëngulte se ishte një gjeni, librat i “ha” jo i lexon si pjesa tjetër e frymorëve humanë. Për një vit bën tre mastera, (një Zot e di sesi), që sado “gjeni” të jetë, nuk lejohet procedurialisht të bëjë tre mastera në një vit…!
Ky është Gent Cakaj, zëvendësministri për Europën dhe Punët e Jashtme, me autorizim ministri nga kryeministri…! Është i veçantë, dhe ndërsa zhvilloi një intervistë të butë, aspak provokative dhe agresive të Blendi Fevziut, Cakaj nuk ia doli që të paktën publikisht të kamuflonte idenë se aty ishte për shkak të zotësisë dhe jo miqësisë.
Është fare i ri, por fati i erdhi se në kohën e duhur dhe momentin e duhur gjeti miqtë që të ndryshojnë jetën. “Njohjet e mia me kryeministrin kanë qenë të kahershme, që në vitin 2017…”-tha Cakaj, që në jetë e ka nisur karrierën si zëvendësministër.
Po vetëm kaq për Cakajn, është gjynah të rëndohet më shumë. Nuk është faji i tij që sot përfaqëson një nga ministritë më kyçe në vend. Është pamja e Shqipërisë në arenën ndërkombëtare, faji në këtë rast nuk është i “kërriçit”, por i “gomarit” të madh.
Tashmë janë bërë të ditura se Cakaj është një dhuratë që erdhi nga Prishtina, si pako në kryeministri nga dërguesi Baton Haxhiu, për marrësin Edi Rama. Klientelizmi politik nuk është risi në vendin tonë, as ndërhyrjen nepotike, por kur ato bazohen të paktën në disa kritere kryesore profesionale, mundin që të mbulojnë këtë amoralitet me shumicë që ofron politika.
“Më shumë rri me Ramën sesa me familjen time”-tha nën çiltërsi ministri Cakaj. Dhe sot të qëndrosh me Ramën, e veçanërisht pas Ramës, konsiderohet meritë, fat, sukses dhe mundësi për të ngjitur shtatë shkallë për një herë në karrierë.
Ngjan me një personazh të letërsisë e më pas kinematografisë shqipe: “14 vjeç dhëndër”! Gjino u martua shpejt, “do bëhem burrë, si baba”-tha ai. E në fund gjithçka përfundoi në mënyrë groteske ku Gjino e kuptoi se nuk mund të bëhej burrë pa mbushur moshën. Në fund kjo “martesë pa mend” ra si përgjegjësi mbi Babain e Gjinos…
Sot kjo po përsëritet, jo brenda familjeve me mentalitet mesjetar, por bash në zemër të pushtetit. Shtetin Rama e konsideron si bahçen e tij personale, ku ka të drejtë të ngulë e shkulë pemë, të mbjellë lule e barë, apo të vendosë një banjë portative për nevojat e tij…
Autoritarizmi i tij tregohet edhe në këtë rast kur propozoi për Ministër të Jashtëm një emër që nuk të thonte asgjë. Djalosh 27 vjeç kur u propozua, sot 28 vjeç me katër muaj karrierë ministrore.
Mos gjykoni Cakajn, një ditë, nëse deliri do i iki dhe adoleshenca ndonëse e vonuar mund të shkojë me vitet, edhe vetë do e kuptojë se suksesi më i madh nuk ishte njohja me Ramën. Ai ishte momenti që truri i tij prej “gjeniu” pushoi se menduari më thellë.
Rilindja ka hapur “lavazhe” moderne, ata lajnë e shpëlajnë trurin, duke të hequr çdo grimcë mendimi dhe gjykimi, duke u lënë vetëm një dimension: “Rama, reformat e tij, lideri shpirtëror, Skënderbeu ynë”…!
