Në takimin e radhës me qytetarë që kanë gjetur zgjidhje pas ankesës në platformën e bashkëqeverisjes, kryeministri Edi Rama tha se numri i nëpunësve të pushuar nga puna për shkak të shërbimit jo të denjë ndaj qytetarëve ka shkuar në mbi 600.
Deklarata u bë pasi një qytetar, tregoi historinë e tij se si e kishin sorollatur për një problem që kishte me tokën.
“Ankohu ankohu më thanë mua, se do ta gjesh. Kështu më thanë atje kur shkoja për të gjetur zgjidhje”- ka treguar qytetari, teksa ka folur në sy të Ramës.
“Qeveria punon, por ata poshtë. Shikojnë nga duart, po nuk u dhe gjë nuk gjen zgjidhje”- tha më tej ai.
Pas tij, Rama tha se “Janë sot që flasim mbi 600 individë, që nga nëpunës të nivelit të zyrave të kontakteve me qytetarët deri tek drejtues të këtyre zyrave, të cilët janë larguar pikërisht sepse nuk kanë qenë të denjë në shërbimin ndaj qytetarit”, tha Rama në një takim të bashkëqeverisjes me qytetarët në kuadër të platformës “Shqipëria që duam”.