Ashtu siç u paralajmërua një ditë më parë, “Bindja Demokratike” u regjistrua në Gjykatën e Tiranës, këtë të martë, kur edhe skadon afati për regjistrimin e partive politike në zgjedhje.
Regjistrimi vjen në një kohë kur, afatet për regjistrimin e një partie në Gjykatë e KQZ janë të tilla që nuk mundësojnë brenda disa orësh regjistrimin e një force politike të re.
Nëse paraqet kërkesën, duhen 2-3 ditë që Kryetari i Gjykatës të hedhë shortin dhe të caktohet gjyqtari që shqyrton kërkesën. (Vetëm me miqësi dhe extra-ligjërisht mund të hidhet shorti dhe caktohet gjyqtari brenda disa orësh).
Pas kësaj, gjyqtari i caktuar duhet të caktojë datën e seancës gjyqësore brenda 10 ditësh.
Ditën e seancës do këqyren, kushtetutshmëria, 3,000 firmat (duhet të jenë në 2 kopje, një origjinal te Noteri dhe një origjinal për gjykatën), Akti i Themelimit, Statuti,…
Por edhe pasi gjyqtari të dalë me vendimin për “Pranimin e kërkesës për regjistrimin e partisë”, do duhen 15 ditë që vendimi të marrë formë të prerë.
Në këto kushte, mbetet e paqartë se si brenda një dite, u ezaurua procedura e 15-30 ditëve. /Boldnews.al/
