‘Njëra thotë hip se të vrava, tjetra thotë zbrit se të vrava’, ishte kjo një nga batutat më të bukura të filmit shqiptar ’14 vjeç dhëndër’, por që sot ju shkon për shtat deputetëve të rinj të opozitës së Ramës.
Ishte fillimisht Edlira Hyseni, e cila e mori mandatin nga listat e LSI, e cila me një status të ‘kopsitur’ mirë e bukur në Facebook, shkruante se pranoi të bëhej deputete se ja kishte kërkuar djali.
A thua vallë se djali i Edlirës ishte ai që e futi në lista dhe më pas ishte ai që i dha votat për ta bërë ‘mamin deputete’.
Zonja Hyseni me justifikimin e saj se u bë deputete për ti bërë qejfin djalit, nuk ja rriti vlerat Kuvendit pas daljes së deputetëve të opozitës, por përkundrazi ja uli edhe më tej, pasi përveç kriminelëve ajo tregoi se parlamenti shqiptar mund të jetë edhe vend i plotësimit të dëshirave familjare.
Por surprizat dhe deklarata e çuditshme të opozitarëve të Ramës nuk mbarojnë me zonjën Hyseni, pasi një tjetër kandidat që mezi po pret të marrë mandatin e deputetit, sot ka nxjerrë mandatin si sebepçiun e sherrit mes tij dhe gruas, madje kjo e fundit i ka kërkuar edhe divorcin në gjykatë.
Bëhet fjalë për Kujtim Gjuzin, i cili nuk i ndahet KQZ-së (Zëra thonë që edhe gjatë natës rri para KQZ-së nga frika se mos i marrin mandatin që i kanë dhënë qytetarët).
Sot Gjuzi deklaroi se gruaja kërkon të ndahet prej tij, sepse ai refuzon të djegë mandatin. Madje Gjuzi akuzon fillimisht kunatën e tij, e cila me sms kërcënuese i kërkon atij të heqë dorë nga mandati.
Ne nuk e dimë si qëndron e vërteta e zotit Gjuzi, dhe pse gruaja kërkon ta ndajë (Zërat thonë se gruaja kërkon divorcin pasi që kur i ka dalë emri për deputet fle tek KQZ-ja dhe jo në shtëpi), por dimë që edhe sikur kjo të jetë e vërtetë, një intelektual që mban orë amerikane se e do Amerika, nuk mund t’ia lejojë vetes të bëjë deklarata të tilla bombastike, pasi do të mërziste shumë votuesit e tij personalë, dhe në Shqipëri konservatorët i gjen me lopata.
Për ta mbyllur, mjafton të lexosh dy justifikimit e dy deputetëve të rinj, për të kuptuar nivelin e lartë të parlamentit dhe opozitës së komanduar nga Rama. /Boldnews.
