Deputetja Rudina Hajdari ka replikuar me kryeministrin Edi Rama, lidhur me deklaratat e kreut të qeverisë për vendimin e parlamentit holandez, që votoi “pro” kthimit të regjimit të vizave për shqiptarët.
Nga foltorja e parlamentit, Rama akuzoi opozitën dhe tha se, vizat kanë 0 gjasë të kthehen, duke argumentuar se ka proceduara komplekse deri që vendimi i parlamentit holandez të marrë fuqi ligjore.
Ndërkohë, Hajdari u shpreh se vendimi i parlamentit holandez mund të ketë një efekt zinxhir: “Mund të merren nga qeveri të tjera si Franca, Danimarka”…
“Uroj mos të ndodhë, por që të drejtohemi sa më bindshëm për këtë prioritet që kemi si qeveri”, tha.
“Do iu rekomandoja që të keni një strategji të qartë për shqetësimet që ata kanë, unë s’kam dëgjuar një strategji të qartë për emigracionin e parregullt dhe problematikat që shfaqen. Imazhi i Shqipërisë është duke u përkeqësuar. Ky imazh s’ka qenë i tillë para 2013-ës apo 2010-ës, ky imazh ka ndryshuar dhe përgjegjësia s’mund thjeshtë të shkojë te opozita. Prioritetet sociale si shëndetësia dhe arsimi janë çaluese. Kemi një vend që si ka përmirësuar kriteret normale për të jetuar brenda kufijve dhe shumë të rinj profesionistë zgjedhin të largohen nga Shqipëria. Duhet të jemi më bashkëpunues për të pasur një strategji të qartë për të luftuar këtë imazh të shëmtuar që kemi krijuar”, shtoi ajo. /bn/
