Grabitja e 9 prillit brenda pistës së avionëve në aeroportin e Rinasit cënoi sigurinë kombëtare. Qeveria shqiptare nuk nguroi t’ia hidhte fajin menjëherë kompanisë kineze e cila e kishte në koncesion dhe minstrja e Infrastrukturës dhe Energjitikës, Belinda Balluku deklaroi se do të prishej kontrata me këtë kompani.
Por, eksperti i Aviacionit Civil, Dritan Goxhaj, i cili ka komentuar situatën në të cilën ndodhet aeriporti i Rinasit me sigurinë, dhe mundësinë e prishjes së kontratës së shtetit shqiptar me koncesionarin deklaron se pavarësisht grabitjesve të ndodhura në Rinas, sipas kontratës këto nuk janë arsye që mund të çojnë në anulimin e saj.
“Në bazë të kontratës së koncesionarit kjo ngjarje nuk çon në anulimin e kontratës. Në rast se shteti do ta anulonte kontratën në mënyrë të njëanshme kjo çështje do të shkojë në arbitrazh. Nëse shkon në arbitrazh, shteti e humbet këtë çështje për arsye se nuk është paracaktuar se në raste të tilla të kemi ndërprerje të kontratës”,– tha Goxhaj.
Duke u ndalur tek siguria e aeroportit dhe roli i Policisë së Shtetit, Goxhaj tha se autoritet nuk kanë të drejtë të kontrollojnë aeroportin brenda rrethimit, pasi i takon koncesionarit të marrë në dorë sigurinë e aeroportit brenda perimetrit.
Duke u bazuar mbi deklaratën e drejtorit të policisë së shtetit, i cili thotë se sigurinë e ka marrë policia, duket pak absurde, për arsye se policia mund të marrë siguri vetëm jashtë perimetrit të koncesionarit. Brenda perimetrit i takon koncesionarit ta ofrojë sigurinë nëpërmjet një kontraktori. Kurse përjashta janë shtuar masat e sigurisë. Është shtuar edhe patrullimi i policisë ushtarake, e cila patrullon portat. Masat duhet të jenë të shumta që nga përforcimi i rrethimit, përforcimi i portave, shtimi i numrit të punonjësve të sigurisë”, – tha ai.
