Parlamenti i Holandës votoi një ditë për parë pro rikthimit të regjimit të vizave për qytetarët shqiptarë, duke dhënë si arsyetim krimin e organizuar dhe mosndëshkimin e grupeve kriminale nga autoritetet shqiptare.
Vendimi i Parlamentit holandez duket se ka çoroditur eksponentë të Partisë Socialiste dhe Rilindjes, që kanë nisur të gjejnë alibitë e kësaj që ndodhi.
E ndërsa gjatë mandatit të parë shpëtimi i Rilindjes gjehej te ajo që fajin e ka Saliu, në këtë mandat të dytë, duket se fajin e ka Basha.
Të paktën kjo është pohuar publikisht nga Kreu i Grupit Parlamentar socialist, Taulant Balla, i cili me çoroditjen e tij, ka shkuar edhe më tej, duke thënë se vendimi në Parlamentin holandez është marrë nga shokët dhe shoqet e Bashës.
“Së pari duhet të kuptojmë se Parlamenti i Holandës funksionon më ndryshe se tek ne, çdo deputet ka mendimin e tij. Deputetja që e propozoi rezolutën është mike e ngushtë e Lulzim Bashës”, është shprehur Balla.
Kështu pas racizmit, që u tha një ditë më parë si shkak për vendimin e deputetëve holandezë, rilindasi Balla ka gjetur një tjetër shkak, atë që Basha me shokët dhe miqtë e tij në Holandë ka ndikuar dhe ka bërë që të merrej një vendim i tillë.
Dhe ta mendosh që kjo deklaratë vjen nga numri 2 i Rilindjes, që me dëshirë apo pa dëshirë, me meritë ose jo, fatkeqësisht apo fatmirësisht drejton edhe procesin e integrimit të Shqipërisë në BE.
Deklarata e Ballës ka krijuar reagime të ndryshme në rrjetet sociale, ku numri 2 i Rilindjes është vënë në lojë, edhe nga të tijët.
Ndoshta çoroditja te deputeti që akuzohet për lidhjet me të dënuar për trafik droge, ka kaluar çdo cak, aq më tepër kur tentohen të gjehen arsye shumë larg atyre që jepen zyrtarisht nga Holanda.
Mos u çudisni, nesër mund të dëgjoni sërisht Ballën apo cilindo pjesëtar tjetër të Rilindjes, që të thotë se Basha kontrollon vendimmarrjen në Parlamentin holandez…
