Kryeministri Edi Rama, gjatë vizitës së tij në Katar, ka zhvilluar një takim me homologun e tij, Abdullah bin Naser Al Khalifa Al Thani.
Homologët dakordësuan që bashkëpunimi mes dy vendeve të zhvillohet edhe më tej në fusha si ajo e bujqësisë, agro-industrisë, energjisë dhe në mënyrë të veçantë, energjisë së rinovueshme.
Kryeministri i Katarit u shpreh se është ngritur një grup i posaçëm pune, në krye të të cilit është ai vetë, i cili do të realizojë së shpejti një vizitë në Shqipëri, me qëllim identifikimin e potencialeve dhe orientimin sa më të mirë të investimeve në bashkëpunimin Shqipëri-Katar.
Gjithashtu, gjatë takimit u firmosën disa marrëveshje: Marrëveshje Për Transportin Detar mes qeverisë së Shtetit të Katarit dhe Këshillit të Ministrave të Republikës së Shqipërisë; Letër qëllimi për bashkëpunimin ndërmjet Ministrisë së Brendshme të Republikës së Shqipërisë dhe Ministrisë së Brendshme të Shtetit të Katarit; Letër qëllimi për bashkëpunimin në Fushën e Sportit Ndërmjet Ministrisë së Arsimit, Sportit dhe Rinisë së Republikës së Shqipërisë dhe Ministrisë së Kulturës dhe Sporteve të Shtetit të Katarit.
