Protesta e pasdites së djeshme në Tiranë, e thirrur nga opozita, është transmetuar live nga një pjesë e mediave ndërkombëtare, ndërkohë që shumë të tjera kanë pasqyruar zhvillimet në kryeqytetin shqiptar.
Ish-kryeministri Sali Berisha në një postim në rrjet shkruan se BBC, CNN, Fox News, Euronews, New York Times, Washington Post, Reuteurs VOA dhe mbarë mediat e tjera më të mëdha të planetit që transmetuan live cunamin e jashtëzakonshëm të opozitës shqiptare, shpallën Tiranën kryeqytetin e Ballkanit.
“Nderim të madh qindra mijëra protestuesve që shpërndanë në mbarë botën zërin e fuqishëm të opozitës shqiptare. Mirënjohje mediave të mbare globit për mbështetjen e kauzës së drejtë të shqiptarëve të revoltuar”, shkruan Berisha.
Për më shumë se 4 orë mijëra mbështetës të opozitës protestuen përpara Kryeministrisë në bulevardin Dëshmorët e Kombit, ndërsa më pas u zhvendosën para godinës së Parlamentit.
