Kreu i PD, Lulzim Basha pas përmbylljes së protestës më të madhe të shqiptarëve në këto vite pluralizëm, deklaroi se shqiptarët njëzëri firmosën largimin e Edi Ramës.
Sipas tij, zgjedhjet e parakohshme dhe një qeveri tranzitore pa Edi Ramën janë kushti kryesor që qytetarët vendosën me këtë protestë.
“Mirënjohjen më të thellë për ju qytetarë për këtë protestë të pashoqë në historinë e pluralizmit. Mirënjohje për këtë qëndresë monumentale për orë të tëra në këtë muzg të tiranisë dhe bandës kriminale në pushtet dhe në këtë lindje të demokracisë europiane. Ju morët me vete dhe bashkuat në këtë protestë më të madhen e historisë tonë kombëtare, dritën e shpirtit tuaj dhe ndriçuat rrugët shtegun, horizontin e shpresës i cili do të kalojë vetëm përmes zgjedhjeve të lira dhe të ndershme që do tu kthejë shqiptarëve qeverinë dhe parlamentin legjitim. Sot në protestën e 9-të ju keni vulosur në mënyrë të pakapërcyeshme largimin e Edi Ramës si kush i panegociueshëm për qeverinë tranzitore, që do të përgatisë zgjedhjet e lira dhe të ndershme. Ata u munduan të shpërndanin protestën ende pa filluar, me propagandën e cila ushqehet me paratë që u grabitën shqiptarëve. Nuk ja doli dot dhe megjithë sfidën e motit ne ja dolëm të mbanim sot më 13 Prill 2019 protestën më të madhe që ka njohur populli shqiptar shprehëm vendosmërinë tonë për të shkuar deri në fitore. Qeveria kriminale dhe ilegjitime e Ramës që mbahet nga paratë e krimit, sot u soll edhe njëherë si pushtues ndaj shqiptarëve që protestuan. E pra le ta dijë se asnjë veprim i kundraligjshëm asnjë përpjekje nuk ka për të patur sukses. Fundi i Edi Ramës është firmosur dhe vulosur nga populli sovran. Por përgjigja e sotme përmes bashkimit më të madh që shqiptarët kanë bërë për një kauz jetike si liria, demokracia dhe drejtësia e vërtetë, ky bashkim i madh do të vazhdojë ditë e natë”, tha Basha. /bn/
