Ministrja e Energjisë dhe Transporteve Belinda Balluku me një gjuhë të ashpër delegoi tek koncesionari përgjegjësinë e thyerjes së sigurisë në aeroportin e Rinasit vetëm 3 ditë më parë nga një bandë grabitësish të cilët morën jo pak, por rreth 10 milionë euro të 3 bankave në vend.
“Koha ka mbaruar për të toleruar koncesionarin kinez për të vazhduar e ndërtuar parkingje dhe të mos plotësojë parametrat e sigurisë.” tha ajo.
Ministrja sqaroi se nga Autoriteti i Aviacionit Civil janë konstatuar herë pas here mospërmbushje të kushteve dhe kjo i është transmetuar koncesionarit duke i lënë afat për ndërhyrjet. Sipas saj në disa raste janë bërë modifikime të vogla aty ku ka ndodhur problemi, ose është premtuar një afat për përmbushjen e detyrave të lëna.
“Po ju jap rastin e derës A nga ku ka ndodhur problemi në 2016-n. Sipas llogarive koncesionari paguan gjobat që vendosen nga autoritetet por s’do të përmbushë kushtet e sigurisë. Ne kemi kuptuar që koncesionari nuk do të ndërmarrë asnjë lloj mase. Këtu ku ndodhemi në një situatë ku do na duhet të ndërhyjmë edhe jashtë rregullave”, tha Balluku.
Por sa e vërtetë është kjo?!
Në një dokument të siguruar ekskluzivisht për Fax Web, dalë pas hetimeve të nisura pas megagrabitjes në pistën e Aeroportit “Nënë Tereza”, rezulton se kompania koncesionare ICTS Albania as nuk është gjobitur dhe as nuk i janë gjendur ndonjëherë shkelje nga të gjithë auditet e kryer nga viti 2005 e mbrapa.
Ky dokument, hedh poshtë të gjithë pretendimet e ministres Balluku dhe qeverisë shqiptare se kompania e cila administron territorin e Aeroportit Rinas ka neglizhuar detyrat e dhëna nga autoritetet shqiptare dhe se në asnjë rast nuk ka pasur penalizime ndaj saj.
Që prej 3 ditësh, pala shqiptare dhe ajo private në këtë rast kompania ICTS Albania janë përfshirë në një ping-pong përgjegjësish për garantimin e sigurisë në aeroportin e vetëm në vend.
Pas vjedhjes spektakolare, të përsëritur, në këtë territor, qeveria shqiptare angazhoi dhe Forcat e Armatosura për të garantuar sigurinë, ndërsa vetë ministrja Balluku “është kujdesur” që përgjegjësitë të shkarkohen tek kompania ICTS. Kësaj të fundit me sa duket dhe përpos dhjetëra problemeve që ka pasur me garantimin e standardeve të sigurisë në Aeroportin “Nënë Tereza”, nuk i është tërhequr asnjëherë veshi nga “roja”, shteti shqiptar, ndryshe nga ç’proklamoi me të madhe ministrja Belinda Balluku. /Faxweb.
