Nga Boldnews.al
Ai duhet të ishte personi më i shqetësuar në këto momente, por çuditërisht është shfaqur më i qetë se kurrë. Papërgjeshmëri, apo siguri se siguria funksionon, kjo mbetet për tu parë nga ministri i Brendshëm Sandër Lleshaj.
“Jua them miqësisht nuk ka asgjë për t’u alarmuar. Jemi krenarë që instrumentet e tjera funksionuan. Policia reagoi në kohë rekord dhe në mënyrë të paparë”-theksoi Lleshaj në Parlament. Sërish bëri përgjegjës si pjesa tjetër e ministrucëve të Ramës kompaninë kineze që administron Aeroportin e Rinasit. Për 3.5 minuta, qeveria dhe gjithë shteti i “sigurisë” ra në duart e një grupi kriminal, që i kishte të gjitha mundësitë që veç 10 milionë eurove, të rrëmbenin edhe avionin me 104 pasagjerë në bord.
Ministri i Brendshëm gjithashtu justifikoi edhe përfshirjen e Forcave Ushtarake në ruajtjen e perimetrit të jashtëm të Aeroportit të Rinasit. “Kjo ndodh edhe në vende të zhvilluara”-argumentoi gjenerali, i veshur me kostum ministror. Si njeri i lexuar, që për pak desh u bë president në vitin 2012, me propozim të Edi Ramës, e ka të qartë se në ato vende që është angazhuar ushtria ka ndodhur si shkak i luftës kundër akteve terroriste.
Po në Aeroportin e Rinasit çfarë terroristësh ishin? Përfaqësonin famëkeqen ISIS, ishin një sekt “neofashist”, apo agjentë të huaj që e kanë “halë në sy” zhvillimin e Shqipërisë?
Në fakt bëhej fjalë për një bandë të armatosur rëndë që theu çdo parametër sigurie, grabiti 10 milionë euro, ua ngriti duart përpjetë punonjësve të sigurisë dhe u larguan me thësët me valutë.
Nderi në këtë rast nuk ua shpëton një patrullë e policisë (që mbetet për tu vlerësuar në maksimum), e cila u vu në ndjekje të autorëve, ku njëri prej grabitësve mbeti i vrarë dhe të tjerët përfituan të largoheshin bashkë me shumat e mëdha.
Policia dështoi jo në zinxhirin zbatues, por atë komandues. Me krenari të madhe ditën e ngjarjes, kryepolici Ardi Veliu u shfaq në krah të zëvendëministrit të infrastrukturës flokëlyerin Artan Shkreli dhe zëvendëministrin e brendshëm Besfort Lamallari. Shkreli arkitekt, ishte ai që foli për masat e sigurisë, ndërsa Lamallari u paraqit sa për dekor.
Dhe ministri Lleshaj sot përfaqëson strukturat policore. Ata efektivë që detyrohen të zbarkojnë dhumshëm kundër qytetarëve që protestojnë ndaj qeverisë, kundër banorëve që mbrojnë shtëpitë e tyre nga histerizmi shtetëror.
Me futjen e ushtrisë në sigurinë e Aeroportit të Rinasit, ministri i Brendshëm që flet për normalitet, dështoi. As të dhënat se ushtria ka “rrethuar” kinezët që administrojnë aeroportin nuk janë shembuj që Lleshaj të tregojë krenari. Policia heton, zbulon dhe arreston shkelësit e ligjit, që në rastin e 9 prillit ishte inekzistente! Shefat e mëdhenj të policisë kërkojnë medalje në gjoks, por ato i takojnë vetëm patrullës me pesë policë të FNSH-së që shpëtoi nderin e uniformës së tyre, por jo të qeverisë. Ajo ra në orën 15.04 minuta të 9 prillit 2019…!
