Nga Boldnews.al
Për ministren e Infrastrukturës dhe Energjitikës fajin për grabitjen e bujshme brenda avionit në Aeuroportin e Rinasit fajin e kanë kinezët. “Kjo është një ngjarje shumë e rëndë dhe e përsëritur për fat të keq. Të gjitha përpjekjet e autoriteteve shtetërore për t’i imponuar kompanisë kineze (TIA), që mban në koncesion Aeroportin e Rinasit, investimet e nevojshme në sistemin e sigurisë, nuk janë dëgjuar ashtu si duhet”-deklaroi dje Belinda Balluku.
Po kjo është shumë pak para një akti të përsëritur. Pesë grabitje të bujshme në Rinas në katër vitet e qeverisë së Ramës, janë treguesi se sistemi i sigurisë, në zonën që duhet të jetë më i sigurti në vend jo vetëm ka dështuar, por i ka hequr të “gjithë rrobat” para krimit.
Në konventat ndërkombëtare të Aviacionit Civil, e miratuar në vitin 1947, që njihet si “Konventa e Çikagos”, sanksionohet se: “Shtetet janë përgjegjëse për çdo akt të ndërhyrjeve të paligjshme në territoret e tyre, ndaj avioneve të tyre dhe të shteteve të tjerë. Përgjegjësia individuale e çdo Shteti anëtar në këtë konventë, për garantimin e sigurisë në Aviacionin Civil, është boshti i doktrinës së Konventës së Çikagos”.
Edhe Shqipëria e ka nënshkruar në vitin 1991 dhe që nga ajo kohë, është e detyruar ta zbatojë me përpikmëri. Po ngjarja e djeshme, që bëhet edhe më e rëndë për shkak të përsëritjes, i ka “çjerrë maskën”, jo grabitësve, por qeverisë sonë.
Por kemi një qeveri me parimin e Rilindjes: “Fajin e kanë të tjerët”… Kryeministri Rama për situatën në vend në përgjithësi fajin e ka opozita dhe media, më parë fajin e kishte aleatja në bashkëqeverisjen 2013-2017 Lëvizja Socialiste për Integrim. Dhe kur nuk mjaftojnë “fajtorët e brendshëm”, për krimin e rëndë të djeshëm me grabitjen e 10 milionë eurove brenda avionit të mbushur me 104 paragjerë, fajin e paskan kinezët.
“Fakti që aeroporti njësoj si të gjithë aeroportet në Evropë, nuk mbrohet e as garantohet në sigurinë e vet nga Policia e Shtetit, po nga sistemi i sigurisë së vetë kompanisë, nuk do të thotë aspak se ne duhet e do të rrimë me duart të lidhura. Aspak. Shteti do të flasë qartë dhe do të veprojë me të gjithë fuqinë e detyrimit për të garantuar sigurinë dhe funksionimin normal të aeroportit të vetëm ndërkombëtar të vendit”-përfundoi Balluku.
Po cili shtet do të flasë, cila polici do tregojë sot forcën e shtetit? Policia dje ishte e angazhuar në prishjen e banesave në zonën e Bregut të Lumit në Tiranë. Forcat speciale me gaz lotsjellës dhe skafandra po arrestonin “kriminelët” gra, fëmijë, e burra të moshuar që tentonin të mbronin banesat nga fadromat e Lali Erit të Bashkisë Tiranë.
As një degë e hollë ku po mbahet qeveria, (nga reagimi i një patrulle policore që u vu në ndjekje të autorëve), nuk e shpëton dot, të paktën në sytë e opinionit ndërkombëtar. Por mos u çudisni, shumë shpejt Rama do mbajë një spektakël në ERTV ku do shfaqet si kryegardiani i sigurisë.
Që do pompojë me gjeste, gjestikolacione, tonacion zëri se këtu ka shtet dhe qeveria po rivendos sigurinë, e sidomos do i japë një mësim të mirë “sabotatorëve kinezë” që administrojnë Aeroportin e Rinasit.
