Një ditë më parë u grabit në pistën e aeroportit të Rinasit një sasi e konsiderueshme parash, ndërsa rreth 2 km larg vendit të ngjarjes si pasojë e shkëmbimit të zjarrit me policinë, mbeti i vrarë një prej grabitësve.
Sot u publikua se viktima është Admir Murataj. Ishin fillimisht mediat greke që emetuan lajmin, ndërsa policia shqiptare ende nuk ka nxjerrë një konkluzion zyrtar. Sipas policisë, mes viktimës dhe Admir Muratajt ka ngjashmëri, por kjo do të provohet pas analizës së ADN-së. Mësohet se përgjigjia për analizat do të vijë nga Greqia.
Ndërkohë i vëllai i Admir Muratajt ka kërkuar një informacion nga policia nëse viktima është vëllai i tij.
“Familja po merr ngushëllime, por nuk kemi një informacion zyrtar nëse viktima është Admir Murataj”, shprehet vëllai i tij.
Ndërkohë, prej mbrëmjes së djeshme, policia ka shoqëruar dhe ka marrë në pyetje familjarë të Admir Murataj.
