Nga Boldnews.al
Në ditën e parë të Punës si Ministër i Mirëqenies Sociale në vitin 2013, Erion Veliaj (ende i pa vetëshpallur me pseudonimin Lali Eri), mbajti një fëmijë rom në krahë dhe e dërgoi në Spitalin Ushtarak. Atë moment “historik”, e fiksuan aparatët fotografik dhe një kamera e zyrës propagandistike të ministrisë që drejtonte.
Djalë i zgjuar, preku zemra, bëri deklarata të forta se do vihej në dispozicion të shtresave të varfra sociale dhe se do të gjendej në çdo familje që vuante nga padrejtësia. Por Erioni mëngëpërveshur që nuk linte detaj pa kupjuar presidentin amerikan të kohës Barak Obama, vlente vetëm për imazhin e qeverisë, që mrekulloi Raman, e më pas ky i fundit e kandidoi Veliajn për kryetar Bashkie në Tiranë. Këtu nisi trimërimi i Erion Veliajt, menjehërë sapo fitoi bashkinë e kryeqytetit!
Fillimisht mori në duar hartën e Tiranës dhe përcaktoi zonat ku ishin troje të lira, e mbi ta nisi histerizmi i ndërtimit të pallateve, kullave dhe komplekseve të tjera të shërbimit nga pjesa e etur të oligarkëve. Lali donte sy, kërkonte vëmendje dhe nisi projektin e dyshimtë për mbjelljen e pemëve duke paraqitur shifra që do i kishin zili edhe vendet nordike, por gjelbërim masiv nuk po shohim. Edhe ato shkurre të rritura nuk po i bëjnë ballë lugunisë së ndërtimeve që ka mbytur frymën e çdo qytetari nga ndotja e madhe.
Sot kryebashkiaku i Tiranës është kthyer në rrezikun e madh të një neodiktatori që po përdor institucionet e vendit në terrorizimin e qytetarëve, shkatërrimin e shtëpive, manipulimin e drejtësisë, lidhjet me oligarkët dhe ngritjen e kalasë së propagandës që shuan që në gjenezë çdo zë kritik.
Forca e pushtetit policor po bie mbi shtresat e varfra. Kushdo që shet buzë rrugës ndonjë tufë sallatë gjobitet e fyhet nga Policia Bashkiake, kushdo që tenton të mbrojë mallin përfundon me hematoma e fraktura nga dhuna e “Grupit të Gatshëm” në po të njëtën strukturë të policisë.
Dhunë, përqëndrim i parasë publike në pak duar, taksa dhe tarifa shërbimi të rritura dhe mbajtje të pushtetit nëpërmjet terrorit. Kjo është ajo që ndodh çdo ditë mbi qytetarët, por e kundërta publikohet. Leli Eri shfaqet në publik nëpërmjet mediave të blera apo shantazhuara si njeriu që po transformon Tiranë, si kryebashkiaku që nuk lë çerdhe, kopsht, e shkollë pa përdorur fëmijët për kurimin e tij propagandistik.
Kështu lindin diktaturat! Nisin me propagandën dhe mbyllen me dhunë, frikë masive dhe mposhtje të çdo fryme e rryme kritike.
