Një ngjarje e rëndë ka ndodhur në orët e para të mëngjesit të sotëm në lagjen ‘Va Shënkoll’ të fshatit Breg në Pukë. Një banesë u përfshi nga flakët rreth orës 02:00 të mëngjesit, ndërsa humbën jetën bashkëshortët Petrit dhe Dava Ndoj, 40 dhe 35 vjeç.
Dëmtime të lehta kanë pësuar dhe katër fëmijët e tyre, të cilët janë hedhur nga dritarja e katit të dytë.
Nga raportimet mbi ngjarjen mësohet se fëmijët, më i madhi 12 vjeç , kanë arritur të shpëtojnë nga flakët edhe gjyshen e moshuar, e cila ishte e paralizuar dhe nuk kishte mundësi të ecte.
Alarmin për zjarrin e ka dhënë i zoti shtëpisë Pal Gjoni, i cili kishte dëgjuar zhurmën e tjegullave. 82-vjeçari me bashkëshorten e paralizuar po flinin po ashtu në katin e dytë të banesës, ndërsa fatmirësisht kanë arritur të dalin pa dëmtime.
Trupat e pajetë të Petrit dhe Dava Ndoit u gjetën pranë njëri-tjetrit teksa kishin tentuar të dilnin nga dhoma.
Forcat zjarrfikëse të Pukës dhe Fushë Arrëzit kërkuan rreth dy orë për gjetjen e trupave nën mbetjet e zjarrit.
Policia dhe grupi hetimor ndodhen në vendngjarje dhe po punojnë intensivisht për zbardhjen e rrethanave.
