Për protestën e 13 prillit duhet një organizim kapilar. Kështu mësohet të jetë shprehur kreu demokrat Lulzim Basha gjatë një mbledhjeje të zhvilluar me kryesinë dhe ish-deputetët e PD-së.
Kjo mbledhje i paraprin asaj të Këshillit Kombëtar, ku pritet të merret një vendim mbi atë se çfarë strategjie do të ndjekë partia më e madhe e opozitës.
Burime nga PD shprehen se në mbledhjen me kryesinë dhe ish-deputetët, Basha është shprehur se situate është në favor të opozitës dhe qytetarëve. Ai ka kërkuar një angazhim maksimal të strukturave dhe forumeve të PD-së për organizimin e protestës më 13 prill, e cila sipas kreut demokrat duhet të jetë me pjesëmarrjen më të lartë.
“Ne de fakto jemi shumicë. Vendimi për djegien e mandateve ka rritur pritshmëritë e qytetarëve ndaj PD dhe opozitës. Situata është e gjitha në favorin tonë. Kemi pasur rritje të mbështetjes nga momenti që kemi dorëzuar mandatet”, mësohet të jetë shprehur kreu demokrat.
Në vijim ai ka shtuar se gjithë këtë mbështetje popullore ne duhet ta përkthejmë në votë. Sipas tij, nga çdo sondazh, rezulton se PD dhe opozita kanë shumicën absolute.
“Duhet të shpjegojmë në çdo takim që ne jemi shumicë, ne kemi mbështetjen më të madhe”, mësohet të jetë shprehur Basha. /BN/
