Nga Boldnews.al
Një ditë pasi një punonjës e akuzoi Drejtorin e Patentave, Blendi Gonxhe, se po përfiton 400 milionë lekë të vjetra në muaj nëpërmjet korrupsionit, ish-zëvendësi i Ramës ka zgjedhur të përgjigjet në mënyrë indirekte.
Në profilin zyrtar të Drejtorisë së Përgjithshme të Transportit Rrugor (DPSHTRR) në rrjetin social “Facebook”, Blendi Gonxhe ka postuar një “risi” në dhënien e “targave të veçanta”.
Sipas informacionit publik, cilido person që kërkon targa të veçanta, duhet të paguajë një çmim më të lartë se sa normalja.
Sipas postimit të Gonxhes, kjo nismë është ndërmarrë për të shmangur korrupsionin, si edhe për të mbushur arkën e Drejtorisë së tij.
Kjo nismë nuk është një zgjidhje origjinale. Ajo aplikohet në shumë vende të botës dhe, natyrisht, kushdo që kërkon diçka “luksoze”, duhet të paguajë më tepër.
Por Gonxhe, këtë sipërmarrje të re, e shoqëron me disa dyshime për paraardhësit e tij.
Alo Drejtor!
Është një kolazh fotove që shoqëron postimin e Gonxhes, duke aluduar se, para tij, “targat e veçanta” merreshin vetëm nëse telefonoje drejtorin. Blendi Gonxhe nuk jep asnjë të dhënë se cili drejtor paraardhës u jepte “zgjidhje” kërkesave në këtë mënyrë.
Ai vijon më tej: “Sistemi i ri, pa mik, pa drejtor…. lekët në arkën e Drejtorisë”, qartësisht duke aluduar se paraardhësit e tij i “zgjidhin” kërkesat e veçanta nëpërmjet korrupsionit.
Deri këtu, Gonxhe sillet si një qytetar i thjeshtë, i cili dyshon se procesi i dhënies së targave është bazuar në korrupsion.
Por, Blendi Gonxhe, nuk është një qytetar i thjeshtë. Ai sot është Drejtor i Përgjithshëm i Targave dhe ka detyrimin funksional që të kallëzojë penalisht çdo vartës apo ish-drejtor të përfshirë në veprime korruptive.
Në postimin zyrtar në “Facebook”, drejtori Gonxhe duket i bindur që, jo ai, por paraardhësit e tij kanë bërë korrupsion.
Por, Gonxhe nuk jep asnjë të dhënë se sa kallëzime penale ka bërë ai për paraardhësit e tij. Gjithashtu, ai nuk jep të dhëna se sa ishte shuma e parave që kanë marrë paraardhësit e tij për të dhënë këto “targa të veçanta”.
Pa u dhënë përgjigje këtyre pikëpyetjeve, Gonxhja, nuk ndryshon, as më shumë e as më pak se sa punonjësi i tij, i cili e akuzon se fiton 400 milionë lekë korrupsion në muaj.
Gonxhja akuzon paraardhësit, vartësi i tij akuzon Gonxhen! Atëherë, pse u dashka të besohet Gonxhja për ish-drejtorët dhe të mos besohet vartësi i tij (anonim) për korrupsionin e Gonxhes?!?!
