Zyrtare të Lëvizjes Socialiste për Integrim kanë bërë thirrje “për pakt kombëtar” këtë të hënë. Deklaratat vijnë disa ditë pas ftesës së kryeministrat Edi Rama për bashkëpunim opozitës së larguar nga parlamenti.
Mbetet ende e paqartë nëse deklaratat që vijnë nga radhët e LSI-së janë një flirt për kryeministrin Edi Rama.
“Sot më shumë se kurre kemi nevojë qe te rrisim besimin te zgjidhjet politike, ne interes të qytetarëve, për zgjidhjen e problemeve jetësore te tyre dhe për t’i dhënë fund trazicionit. Sot vendi ka nevojë për të krijuar një Pakt Kombëtar, qe t’i jepet fund tranzicioni, që vendi të shkoje drejt integrimit europian”, tha ish-deputetja e LSI-se Nora Malaj në emisionin “Debati” në “Channel One”.
Edhe zëvendëskryetari i LSI-së Luan Rama ka hedhur idenë e një “pakti kombëtar për integrimin europian të vendit ”mes të gjithë aktorëve dhe faktorëve politikë”.
Kjo sipas tij, për të mundësuar realizimin e reformave, qe përfaqësuesi i lartë i LSI-së i cilësoi “jetike” për vendin, duke specifikuar reformën kushtetuese si më të rëndësishmen, për garantimin e ndarjes së pushteteve sipas parimit “chek and balance”, por edhe reformën zgjedhore për garantimin e votës së lirë që qytetarët të zgjedhin të lirë si në çdo vend demokratik të BE-së ku duam të bëhemi pjesë dhe që grupet e krimit të organizuar të mos përcaktojnë më përmes blerjes së votës se kush do të jetë maxhoranca dhe kush minorancë në parlament.
Luan Rama theksoi se pjesë e këtij pakti duhet të jetë edhe reforma në drejtësi, me qëllim që ajo të garantojë drejtësinë e ligjit për të gjithë dhe jo drejtësinë me dy standarde siç po rezulton të zhvillohet edhe procesi i vetingut. /BN/
