Ardian Mema, tekniku i Tiranës, ka lëshuar sot bombën mbi mënyrën sesi vendosen ndeshjet në tavolina, ndërsa ekipi i drejtuar prej tij humbi në transfertë me Flamurtarin.
“Ka ardhur koha që të bëhen ndeshjet në një orar. Ishin të pezmatuar para se të futeshin në fushë. Ndoshta kjo ka krijuar një lloj stresi. U mundova ta qetësoj ekipin. i thashë që duhet të bëjmë llogaritë tona, dhe jo llogaritë e të tjerëve. Ndeshjet vendosen edhe nga episodet, vendosen edhe nëpër tavolina. Kjo duhet thënë, sepse po rrini disi urtë, por duhet thënë. Le të luajnë futboll provincat dhe të kënaqen edhe provincialët. Ne jemi ekip që i pranojmë të tre rezultatet, por këtu është province”, shtoi ai.
“Lojërat nuk na mungojnë, por kemi marrë rezultate të këqija. Ekipi që është profesionist, duhet të shënojë në një moment. Në Shqipëri fitohet edhe me episode, por ne na duhen fitoret, jo të luajmë mirë.
Ndoshta është ana psikologjike. Para Laçit, provova shumë lojtarë për penallti, dhe konstatova se nuk kemi goditës të mirë. Sot caktova dikë tjetër, por sërish më rrezikoi keq. E caktova para ndeshjes dikë tjetër, por ishte këmbëngulje e Imamit për të goditur, dhe u la ashtu si u la”, tha Mema.
