Nga Boldnews.al
Thonë se biznesi është i pari që ndjen erën e ndryshimit politik. Dhe, po biznesi, me të drejtën e tij, është i pari që ndërmerr hapat për t’u pozicionuar në realitetin e ri. Por, edhe për të mbyllur çështjet e mbartura me pushtetarët që po largohen.
Kjo duket se po ndodh me “oligarkët” politikë e politiko-mediatik në këto orë të fundit në Shqipëri.
Mesditën e sotme, biznesmeni më i fuqishëm në Shqipëri, Samir Mane dhe drejtori i televizionit më të madh privat në vend, Ben Blushi, u panë duke hyrë nga dera e pasme e kryeministrisë.
Është afërmend që bujtësi i tyre nuk mund të ishte Endri Fuga, nuk mund të ishte as ndonjë zyrtaruc i kabinetit kryeministrit. Dy personazhet publikë kanë ndërmarrë këtë ngjitje shkallësh deri në katin e dytë të ndërtesës, aty ku ka zyrën ngjyra-ngjyra kryeministri Edi Rama.
Shefi i kabinetit është në orët e tij më të vështira politike. Ai po sheh se si investimi i tij 20-vjeçar në pushtet po i vjen fundi. Dhe, jo vetëm fundi i pushtetit të ‘Rilindjes”, por e tija si qënie politike.
Në orë të vështira duhen “miqtë”. Këtë rol duket se e kanë marrë Samir Mane dhe Ben Blushi, nëse ata mund të konsiderohen realisht “miqtë” e Edi Ramës.
Samiri ka dëshmuar se është mik me postin e kryeministrit, jo me emrin që e mban përkohësisht atë detyrë. Natyrisht, ai i ka dhënë vetes të drejtën për të qenë “vizitor” i rregullt i zyrave kryeministrore, përsa kohë që bujtësit e kanë mirëpritur. Pra, i pari, Samiri, nuk mund të quhet mik “ekskluziv” i Edi Ramës.
Ben Blushi, socialist i orëve të para, u nda keqazi me Edi Ramën gjatë mandatit të parë të “Rilindjes”, Fjalimet e tij plot figura letrare kundër qeverisë socialiste të Ramës ua kalonin ku e ku atyre të opozitës reale.
Blushi doli “me ceremoni” nga jeta politike e “Rilindjes” dhe iu rikthye profesionit të vjetër të gazetarit. Në krye të Top Channel, Ben Blushi ridimensionoi pozitën e tij publike dhe tashmë i ka dhënë të drejtën vetes që të jetë “vizitor” i zyrës së Edi Ramës.
Nuk dihet dhe, natyrisht nuk mund të kuptohet shpejt biseda mes këtyre tre personazheve. E dukshmja është ajo që transmeton Top Channel-një seri kronikash-reklamë për sukseset imagjinare të “Rilindjes”.
Por të jetë vetë kaq vallë? Pra, këta burra të vizitojnë kryeministri nga dera e pasme vetëm për të bërë disa lajme të mira për qeverinë në Top Channel?
Duket e vështirë për t’u besuar, pasi Top-i i Blushit ka qenë gjithnjë në krah të “Rilindjes” dhe “para-Rilindjes”, kur Rama ishte kryetar i Bashkisë së Tiranës.
E, nëse ky takim i “derës së pasme” ka qenë për ca lajme të mira tek Top Channel, po Saimir Mane ishte thjeshtë “shoqërues i Blushit”? Edhe kjo është e vështirë për t’u besuar
Në Shqipërinë tonë nuk ka sekrete jetëgjatë. Madje, disa “sekrete” të kryeministrit janë sa të dukshme, aq edhe të larta në kate. Kryebashkiaku i Tiranës, Erion Veliaj, foli për kulla 40-katëshe të rinj në qendër të Tiranës. Lejet për këto shumë-katëshe kalojnë nga zyra e kryeministrit.
Ndoshta Blushi e Mane thjeshtë kanë ndarë me kryeministrin mendimet e tyre, si intelektualë, mbi zhvillimin e qytetit. Ndoshta.
