Kryetari i Partisë Demokratike, Lulzim Basha gjatë vizitës së tij në Gjermani, ka dhënë një intervistë për DeutcheWelle, ku ka komentuar takimet e tij me zyrtarët e lartë të Bundestagut.
Basha tha se në qendër të diskutimeve ka qenë zgjidhja e krizës në Shqipëri dhe e ardhmja Europiane. Ai tha se edhe miqtë Gjermanë janë të mendimit se Shqipëria në Europë nuk mund të shkojë me një shtet të kapur nga krimi.
‘Takimet që janë orgtanizuar nga mikpritësit e mi në Bundestag, edhe me qeverinë federale, edhe në kancelari dhe në ministrinë e jashtme, kanë për qëllim diskutimin e krizës politike në Shqipëri dhe bashkëpunimin me partnerët tanë strategjikë, Gjermaninë, për tejkalimin e kësaj krize politike, kushtetuese dhe institucionale. Tejkalimi i kësaj krize është shumë i rëndësishëm jo vetëm për stabilitetin dhe demokracinë në Shqipëri, por edhe për të ardhmen europiane të Shqipërisë. Në Europë nuk shkohet me gënjeshtra, nuk shkohet me hilera, nuk shkohet me një shtet të kapur nga krimi. Shkohet me vlera, me të vërteta, me një shtet të çliruar nga keqqeverisja në bashkëpunim me krimin dhe me një parlament të zgjedhur nga vota e qytetarëve shqiptarë’, deklaroi Basha.