Nga Boldnews.al
Teksa shfletoja lajmet në internet, përpara me dalin titrat e një titulli “Rama Shkarkon Drejtoreshat e Tatimeve dhe Doganave dhe i zëvendëson me dy drejtorë të rinj”.
Që zgjedhjet e kryeministrit Rama janë eksperimentale dhe emrat që propozon nuk kanë asnjë njohje dhe aq më pak profil publik, kjo nuk përbën më asgjë të re. Përkundrazi, kjo është e vetmja mënyrë që Rama di të qeverisë pasi atij i pëlqejnë vetëm reklamat dhe surpriza që do të shkaktojë duke sjellë emra që askush nuk i ka dëgjuar më parë.
I kuriozuar, fillova të kërkoj në internet për drejtorët e rinj dhe u shfaq “Flet Drejtori i Kadastrës Fiskale”. Si çdo projekt tjeter që ka nisur Rilindja, ku për gjithcka që kujdeset është vetëm ana estetike dhe aspak përmbajtja dhe realizimi, edhe kadastra fiskale pati të njëjtin fat si “300,000 vendet e punës”, “shendetesia falas”, “infrastruktura evropiane”, mbështetja për sipermarrjen dhe bujqesinë dhe “mireqënie për të gjithë”.
Me bujë të madhe në nëntor të vitit 2017 ndryshuan ligjin “Për sistemin e taksave vendore” duke futur “Kadastra Fiskale” si Regjistri Qendror i Bazës së të Dhënave të Pasurisë së Paluajtshme që do të shërbejë për qëllime të administrimit të taksës mbi pasurinë e paluajtshme.
Për këtë qëllim krijuan edhe Drejtorinë e Përgjithshme e Taksës së Pasurisë dhe drejtor vunë Enton Duron.
Me grantin bujar dhe eksperiencën e qeverisë Suedeze, kadastra fiskale ka më shumë se një vit e gjysëm që ka filluar punën dhe do të duhej të kishte filluar të kishte dhënën edhe rezultatet e para në drejtim përmirësimin e administrimit dhe rritjen e efektivitetit të kësaj takse. Por, mesa duket nën drejtimin e Duros kadastra fiskale është ende larg fillimit të operimit dhe pritshmërive të qeverisë, ku 3 milard lekë shtesë në buxhet nga kjo taksë nuk mund të jenë veçse një utopi. Mesa duket për përformacë të mirë në administrim, Rama e promovon Enton Duron në drejtorinë më të rëndesishmë të të ardhurave të vendit.
Nga të gjitha burimet formale dhe publikimet e Ministrisë së Financave dhe Ekonomisë duket qartas që të ardhurat kanë filluar të bien ndjeshëm nga çfarë ka parashikuar qeveria për 2019 dhe si masë për këtë Rama merr vendimin që kreret e institucioneve duhen ndryshuar.
I nderuar z. Kryeministër bën mire ta kuptosh që performanca e të ardhurave që vijnë nga taksat tona në buxhet të shtetit nuk është një gabim teknik që Ti mund ta zgjidhësh me batuta që u ka dalë boja. Emërimet në postet kyçe të administratës, që Ti aq shumë trupenton se duhet të jenë nga fondi i ekselences së këtij vendi, nuk mund të bëhen për të ngopur egon tënde që edhe këtë rradhë i çuditi të gjithë dhe efekti i suprizës e bëri punën e vet. Uroj shumë që emërimet e fundit të kalojnë pritshmëritë që të mos kesh surpriza negative në realizmin e të ardhurave, nëse Ti vertet shqetësohesh për ecurinë e këtij vendi.
Megjithëse kam të drejtë që këtë të fundit ta dyshoj fort. Tashmë shqiptarët e kanë kuptuar që Ti nuk ke asnjë ndjesi për të përmiresuar jetën në këtë vend, prandaj kanë zgjedhur që me qindra mijëra të largohen nga Shqipëria ku nuk shikojnë më asnjë mundësi për vehten dhe të ardhmen e fëmijëve.
Tashmë duket qartë se lëvizjen që ka menduar kryeministri për ndryshimet në qeveri dhe drejtoritë në fuksionet kryesore tregojnë se “Titaniku i Rilindjes” ka futur ujë dhe mbytja është e pashmangshme. Këtë nuk e kupton vetëm Rama që po përpiqet me të gjitha format të konsolidojë neodiktaturën e tij përmes lëvizjes së marionetave të “Rilindjes”. F.M
