Një ditë më parë, kryeministri i thuri lavde të ashtuquajturës “opozita e re” në parlament. Sot, pasi i vunë në dukje një lapsus nga foltorja e Kuvendit, i sulmoi.
“Ky parlament është shumë më normal dhe i paqetësueshëm se s’vijnë deputetët në Parlament me bojë dhe vezë. Si mund të jetë një opozitë që shkon në parlament me vezë dhe bojë?! Pse, ca është opozita kotec pulash? Këta vonë u kujtuan që të ikin dhe të rrinë në rrugë aty ku zgjodhën të rinë”, tha Rama një ditë më parë.
Ditën e sotme, në foltoren e parlamentit, shefi i ekzekutivit u shpreh: “Jemi në një enjte interesante”.
Një nga deputetët e “opozitës së re” i kujtoi kreut të qeverisë se është ende e mërkurë.
Mesa duket, Ramës nuk i pëlqeu korrigjimi dhe ashpërsoi fjalorin:
“Është e mërkurë, po është gjithmonë e enjte kur ka parlament. Se ngaqë kam humbur shumë kohë këtu me kolegët tuaj të nderuar dhe me kryetarët e partive tuaja. Mos bëni sikur ju s’keni lidhje me ta, ju jeni njësoj si ata. Po me ndryshim që tani jeni akoma në fazën e ambientimit, po shumë shpejt që dhe ju të jeni në lartësinë e pritshmërive të tyre kur ju kanë futur nëpër lista. Kështu që ata ju anatemojnë juve se janë xheloz për ju se dolët më të zgjuar se ata. Ata dolën jashtë dhe tani duhet të futen brenda, kjo është gjëja më e çuditshme. Ikën vetë, tani shtyjnë policët që të futen prapë këtu. Unë nuk e di”, tha Rama. /Boldnews.al/
