Nga Boldnews.al
Ndërsa kryeministri prezantonte Bibliotekën Digjitale në Tiranë, në Shkodër, gra të veshura me të zeza dhe burra me duhan ndër buzë, hynin e dilnin në familjen e mbetur të Astrit dhe Brahim Bilalit, vëllezërit e vrarë paraditen e së shtunës. Për kreun e qeverisë, vendi është në normalitet, ka siguri, ekonomia ecën mirë, punësimi është rritur, investimet e huaja po shtohen dhe krizë politike nuk ka.
Por e vërteta është ndryshe, duke i marrë secilin më vete. Krimi po përhapet frikshëm dhe pasojat nuk janë vetëm mbi grupet rivale që sipas Ramës: “mirë bëjnë që hanë kokat e njëri-tjetrit”, por edhe mbi qytetarët.
Në tetë muaj, në Shkodër shënohen 11 viktima, kjo solli edhe një debat në dukje të moderuar mes kryebashkiakes së Shkodrës Voltana Ademi dhe Ministrit të Brendshëm Sandër Lleshaj. Pak para se të diskutohej mbi sigurinë dhe masat që po merren në qytetin e Shkodrës kryepolici Ardi Veliu u largua në mënyrë demostative, duke iu kthyer numrit një të bashkisë: “Nuk përfshihem në debate politikë”. Në fakt po flitej për çështje rendi, por kryepolici e quan politikë. Ndoshta me të drejtë…
Në Shkodër apo Elbasan, politika është shkak, pasoja janë viktimat. Grupet kriminale prej vitesh, veçanërisht në muajt e fundit ndihen të fuqishëm dhe kanë mundur që të gjejnë përkrahjen e elitë politikës, çka u ka sjellë forcën përballë grupeve rivale.
Elbasani gjithashtu ka shënuar nëntë të vrarë në pak muaj, që të gjitha krime të tipit mafioz. Ekzekutime të pastra, japin mesazhin për grupet rivale dhe më pas pritje pak kohë, deri në regjistrimin e viktimave të radhës.
Situatë mjaft e rëndë e krimit të sofistikuar në vend detyroi ministrin e Brendshëm të vizitojë sërish Shkodrën. “Ato janë produkt i krimit të organizuar në vite, niveli i sigurisë është sfiduar disa hërë, krimi ka arritur që të lëshojë rrënjë. Me gjithë goditjet e mëdha sërish ngelet një sfidë shumë e madhe, ftoj qytetarët që të bëhen palë dhe të gjithë së bashku të sfidojnë krimin. Besoj që me drejtorin e ri dhe përforcimet që do të vijnë do të arrijnë të godasin fort krimin”, u shpreh ministri Sandër Lleshaj.
Në drejtorinë e Policisë së Shkodrës dhe të Elbasanit, ka oficerë të denjë që çdo ditë përballen me bandat, tentojnë t’i shkatërrojnë, por gjithnjë nuk ia dalin. Politika e errët, e lidhur kryesisht me pushtetin ndërhyn, disa drejtues policie bëhen njësh me bandat, prokuroria gjithashtu “bën detyrën” duke i anashkaluar dosjet e nxehta dhe gjykata është gjithnjë në pritje të ndonjë peshku të madh që e blen me para lirinë.
Kjo është edhe pasoja e kanabizimit të vendit përgjatë viteve 2016-2017. Grupet kriminale u fuqizuan edhe më shumë nga trafiku i narkotikëve, ndërsa aktualisht luftën e vërtetë nuk e kanë me shtetin, por me të ngjashmit e tyre. Strukturat e rendit janë kthyer në “agjenci funerale”, pasi shkojnë në vendin e ngjarjes, mbledhin ato pak prova të mbetura dhe “paketojnë” kufomën në rrugën drejt morgut.
