Duket se fermerët dhe grumbulluesit e qumështit nuk do të ndalen në protestën e tyre në lidhje me TVSH-në. Ata do të rikthehen në protestë pas përgjigjes negative të dhënë nga Ministria e Financave se skema e TVSH-së nuk do ndryshojë. Alban Zusi nga Qendra e Eksporteve Shqiptare bëri me dije se protesta e radhës do të mbahet në 3 prill në qytetin e Lushnjës. Ata kërkojnë që qeveria të reagojë dhe të barazojë TVSH-në si në shitje dhe në blerje.
Grumbulluesit dhe tregtarët do të dalin përsëri në protestë në datën 3 prill. Alban Zusi shpjegon se përgjigja negative nga Ministria e Financave për skemën e TVSH-së sjell përkeqësimin e situatës. Ndër të tjera ata paralajmërojnë se në lidhje me këtë problematikë do të venë në dijeni edhe Ambasadat si dhe zyrën e Bankës Botërore.
“Do ti drejtohemi të gjithë shoqatave të Dhomave të Tregtisë për tu solidarizuar me këtë çështje, do ti drejtohemi institucioneve ndërkombëtare, do ti drejtohemi Departamentit për Bujqësinë në Bashkimin Europian, do ti drejtohemi Bankës Botërore. Me datë 3 do të ketë përsëri një protestë tjetër, ku përveç një grupimi të caktuar të grumbulluesve dhe fermerëve të Lushnjës, Fierit dhe Beratit do tu bashkohen dhe fermerë të rajoneve të tjera të Shqipërisë si Shkodra, Korça, Gjirokastra. Më e ndershme, më etike dhe më sociale është që TVSH-ja e produkteve ushqimore të ulet në nivelin 6% edhe në shitjen e tyre te konsumatori fundor” – tha Zusi.
Skema e re e TVSH-së ka hyrë në fuqi që prej 1 janarit me paketën e re fiskale. Kjo ka krijuar një situatë ku industria përpunuese i shet produktet me taksë 20% dhe nga ana tjetër të rimbursohet për blerjet e bëra nga fermerët me 6%. Pjesa tjetër e taksës iu transferohet si kosto shtesë për grumbulluesit, të cilët paralajmërojnë që të ulin çmimet ndaj fermerëve.
