Grupi hetimor duket se ka siguruar shumë prova përmes kamerave të sigurisë lidhur me vrasjen e Jurgen Kurtit, i njohur si menaxheri i VIP-ave.
Ekzekutimi i Kurtit ka ndodhur më 18 mars, shumë pranë banesës së tij, ndërsa policia përveç 3 të arrestuarve, ka shpallur në kërkim shtetasin K.B, që dyshohet se ka qenë në drejtimin e një automjeti tip Mercedez me ngjyrë gri, i cili ka vëzhguar lëvizjet e Kurtit.
Nga kamerat e sigurisë, grupi hetimor, ka zbuluar se ditën e vrasjes, automjeti i regjistruar në Fier me dokumente të rregullta në pronësi të K.B, ka lëvizuar me targa false, të cilat i janë mbivendosur targave të rregullta, në një rrugicë pranë zonës ku ndodhi krimi.
Burimet bëjnë me dije se pasi i janë hequr targat false, mjeti ka qarkulluar me targat e veta.
Ndoshta ky ka qenë momenti që ka krijuar vështirësi në zbulimin e ngjarjes, pasi nga dëshmitë e mbledhura pak orë pas vrasjes por edhe pamjet e sigurisë të zonës pranë, shihej një automjet me targa të huaja.
Policia ka arritur të sekuestrojë pamjet nga 50 kamera sigurie, përmes të cilave janë grumbulluar provat që çuan në arrestimin e personave një ditë më parë, dhe shpalljen në kërkim të një të katërti.
Vrasja e Jurgen Kurtit, detajet e reja/ Ja si funksionoi grupi nga gjurmimi deri te ekzekutimi…
