Të tjera detaje janë zbuluar lidhur me vrasjen e Jurgen Kurtit, i njohur si menaxher i VIP-ave, ngjarje e ndodhur në Tiranë më 18 mars.
Referuar hetimeve, rezultoi se tre të arrestuarit e një dite më parë, Elsi Levendi, 21 vjeç, lindur në Athinë/Greqi dhe banues në Tiranë; Alesio Berberi 33 vjeç, lindur në Patos dhe baunes në Patos, Fier dhe Olsi Qalliaj, 22 vjeç, lindur në Fier dhe banues në Patos, s’kanë pranuar përfshirjen në krim, megjithëse sipas policisë ekzistojnë prova për rolin e tyre.
Burime policore bëjnë të ditur se arma dhe automjeti i përfshirë në krim janë gjetur në shtëpinë e Alesio Berberit, ndërsa të tre të arrestuarit ishin me arsim 8-vjeçar dhe të papunë.
Policia, përmes kamerave të sigurisë, ka arritur të zbardhë skemën e vrasjes. Ekzekutorët, sipas hetimeve, janë njoftuar nga 21-vjeçari Levendi, për mbërritjen e Jurgen Kurtit pranë banesës së tij, atje edhe ku u ekzekutua.
Levendi mësohet se ka ndjekur nga pas Kurtin mbrëmjen e 18 marsit, duke njoftuar më pas vendin ku ai ndodhej.
Nga kamerat e sigurisë policia ka zbuluar se automjeti që është përfshirë në ngjarjen e rëndë ishte Mercedez me ngjyrë gri, ndërsa në drejtimin e tij ishte person ii shpallur në kërkim.
Burimet bëjnë të ditur se 4 personat janë takuar pas vrasjes dhe janë vendosur në përgjim nga policia, moment ky që duket se ka çuar në zbardhjen e krimit.
Burimet bëjnë të ditur se automjeti ishte i regjistruar me dokumente të rregullta në Fier, ndërsa ishte në pronësi të personit të shpallur në kërkim.
Policia ka mundur të mbledhë pamjet nga të paktën 50 kamera siguroi, përmes të cilave provohet lëvizja e personave të përfshirë në ngjarje.
Policia njoftoi një ditë më parë zyrtarisht se veprimet hetimore janë në vazhdim e sipër për të bërë të mundur dokumentimin e plotë me prova ligjore të personave të tjerë të përfshirë në ngjarje, si dhe për dokumentimin e motiveve të ngjarjes.
Policia sekuestroi një automjet që u ka shërbyer autorëve për t’u larguar nga vendi i ngjarjes, si dhe dy makina të tjera luksoze. Gjithashtu u gjet dhe një armë zjarri “Pistoletë TT”, fishekë luftarakë, një sasi prej 2470 Euro e Lekë shqiptare, 13 aparate celular, si dhe një sasi e vogël lënde narkotike.
Emri i Jurgen Kurtit nuk ishte i panjohur për policinë. Ai ishte përfshirë në dy ngjarje të rënda me viktima, një në Tiranë dhe tjetra në Durrës, në 2016 dhe 2017. Gjithsesi në të dy rastet, Kurti ka rezultuar i pafajshëm, të paktën nga hetimet e kryera.
