Policia e Shtetit të tregohet asnjëanëse në procesin zgjedhor. Kërkesa është bërë nga Ambasadori i OSBE-së, Bernd Borchardt, në nisjen e trajnimit të punonjësve të policisë për procesin zgjedhor të 30 qershorit. Ai shtoi se policia duhet të garantojë njerëzit se rezultatet përfundimtare pasqyrojnë vullnetin politik të të gjithë shoqërisë shqiptare.
“Jam i sigurt se sjella profesionale e institucioneve publike, duke përfshirë edhe policinë e shtetit mund të shtojnë tek njerëzit garancinë se vota e tyre me të vërtet është e vlefshme dhe se rezultatet përfundimtare pasqyrojnë vullnetin politik të të gjithë shoqërisë shqiptare. Kam besimin se policia e shtetit do të jetë asnjanës në këtë proces kaq të rëndësishëm dhe do të sillet me profesionalizëm dhe dinjitet”, tha Borchardt.
I pranishëm në këtë tryezë, Drejtori i Policisë së Shtetit, Ardi Veliu tha se pritshmëria do të jetë e lartë për zbatimin e ligjit.
“Shembull i qartë i kësaj janë proceset zgjedhore të viteve të mëparshme ku Policia e Shtetit i ka kryer më së miri detyrat e saj, e shprehur kjo dhe në raportet e strukturave të specializuara ndërkombëtare që monitorojnë zgjedhjet dhe nga partnerët tanë që asistojnë Policinë e Shtetit.
Edhe për këto zgjedhje pritshmëritë për veprimtarinë e Policisë së Shtetit do të jenë cilësisht në rritje dhe të orientuara drejt zbatimit korrekt të ligjit”, tha Veliu.
