Nga Boldnews.al
Disa mjete të rënda të Bashkisë së Tiranës pritën të errësohej për të nisur shkatërrimin e një kopshti fëmijësh mbrëmjen e së Hënës, në zonën e Kombinatit.
Një skrap ka nisur shkatërrimin e një pjese të ndërtesës, ndërkohë që banorët, të cilët jetojnë pranë kopshtit janë gjendur nën një zhurmë të madhe, pa pasur një lajmërim paraprak.
Ndërtesa një-katëshe, e cila së bashku me oborrin zë një hapësirë rreth një mijë metra katror truall pranë ish-Mapo-s së vjetër ka funksionuar si kopësht për disa dekada.
Rreth një vit më parë, Bashkia e Tiranës vendosi mbylljen e përkohshme, pasi objekti kishte nevojë imediati për rikonstruksion.
Mbi 100 fëmijë që frekuentonin këtë kopësht u shpërndanë në disa institucione të tjera para-shkollore në Kombinat.
https://youtu.be/sBkxofc2u6M
Por, ndërkohë që banorët ishin në pritje të rikonstruksionit, mbrëmjen e sotme kanë mbërritur ruspat e Bashkisë, të cilat kanë shkatërruar pjesën jugore të objektit.
Nisja e punimeve të paparalajmëruara ka nxitur banorët që të kërkojnë informacion tek punonjësit për atë që po ndodhte pranë banesave të tyre.
Punonjësit e Bashkisë i kanë informuar se objekti ekzistues do të rrëzohet dhe mbi të do të ngrihet një godinë e re, në të cilën do të këtë ambiente të reja kopësht e çerdhe.
Por ky shpjegim duket se nuk ka bindur banorët e zonës. Në një komunikim me “Boldnews.al”, disa prej banorëve kanë deklaruar se punimet kanë nisur pa një tabelë orientuese. Këtë fakt e konstatoi edhe “BN” në vendin ku po kryen punimet.
Gjithashtu, banorët shprehen dyshues për destinacionin real të këtyre punimeve. Për ta, është e pakuptueshme se përse duhet të nisnin në errësirë.
“Boldnews.al” ka siguruar video dhe foto, të regjistruara nga banorët, cilësia e të cilave nuk është shumë e lartë, për faktin se janë realizuar në kushtet e errësirës. Gjithsesi, ato janë të mjaftueshme për të kuptuar se vartësit e Erion Veliajt kanë pritur natën për të nisur punimet.
Pas pikëpyetjeve të ngritura prej qytetarëve dhe sidomos pasi disa prej tyre filmuam me telefona atë që po ndodhte, punonjësit e Bashkisë ndërprenë punimet dhe u larguan, duke lënë mjetin shkatërrues skrap pranë rrënojave të pjesës së shkatërruar të godinës.
Banorët e zonës deklaruan për “Boldnews.al” se do të vijojnë të ndjekin ecurinë e zhvillimeve me këtë objekt pasi, siç u shprehën ata, “nuk është aspak çudi që, në vend të kopshtit të premtuar, Erion Veliaj të ketë dhënë ndonjë leje ndërtimi për pallat”.
