Analisti Fatos Lubonja i ftuar në rubrikën “Opinion” në News 24, ka komentuar mbajtjen e Kongresit të PS-së, pak ditë më parë. Lubonja u ndal kryesisht te akuzat dhe kritikat e kryeministrit Edi Rama për portalet dhe mediat. Ai theksoi se ka një tendencë për të eleminuar çdo zë ndryshe.
“Për mendimin tim mjaft dukshëm që ishte një gjuhë mjaft agresive ndaj medias, dhe njerëzve që guxojnë të mendojnë. Dhe ai pyet, çfarë mendon ti. Nuk e di çfarë rëndësi i jep mendimeve të disa portaleve, ndërsa thotë që unë kam me vete gjithë Shqipërinë. Ky është një problem që denoncon shqetësimin ndaj vetes dhe prirjet për eliminimin e çdo zëri kundërshtar. Duhet të kishte reflektim. Se problemet që flasim ne kadrinjtë janë reale. Ky këtu i dalin 20 milionë euro të vjedhura haptazi dhe s’ka asgjë dhe quhen kadri. Këto janë gjëra që tregojnë grahmat e fundit të Edi Ramës. Kjo më bëri më shumë përshtypje te fjalimi. Për të mos folur bëjmë një sellfie këtu”, u shpreh Lubonja.
Lubonja u shpreh se në Shqipëri kemi një maxhorancë autoritriste, të cilën e ka quajtur edhe “putiniste”. Lubonja tha se e quan këtë sistem “putinizëm” duke hequr paralelen me atë që ndodh në Rusi, ku Putini udhëheq vetëm dhe opozita është fasadë. Ai shton se Rusia është një vend me thuajse 200 milionë banorë dhe ka edhe industri, ekonomi, kurse këtu mbahet pushteti me krimin.
“Jetojmë në një putinizëm. Por ndryshe nga se ndodh në Rusi, ku ka edhe industri dhe ekonomi, kjo maxhoranca jonë është e lidhur me krimin. Ka premtuar zero ndërtime në Tiranë Rama dhe Veliaj. Mirëpo, Tirana sot është plot ndërtime, me kulla dhe beton”, tha Lubonja.
Fatos Lubonja tha se dokumentari për Shqipërinë në mediat italiane është një përshkrim i realitetit shqiptar.
“Në dokumentarin që kanë pasqyruar mediat italiane, përcjellin realitetin shqiptar. Mirëpo, kishte një mungesë të pjesës se ‘si janë ndërtuar kullat, hotelet luksoze, si funksionojnë gjërat këtu’. Thuhej diku ajo që është e vërtetë se hotelet, kullat këtu ndërtohen me para të krimit. Këto akuza ka artikuluar edhe opozita, kjo është e vërteta për Shqipërinë”, tha.
