Megjithëse kanë kaluar dy ditë nga vrasja e avokatit të njohur Ravik Gurra, që u ekzekutua në një lokal në qendër të Elbasanit, policia ende nuk ka një të dyshuar për krimin e rëndë.
Hetimet, që po drejtohen nga Krimet e Rënda, kanë përcaktuar si pistë atë të vrasjes për shkak të detyrës, ndërsa që po kqyren kamerat e sigurisë së bizneseve pranë zonës, por edhe ato të instaluara në rrugët pranë vendit të ngjarjes.
Avokati Gurra u qëllua me dy plumba në kokë dhe gjeti vdekjen e menjëhershme, ndërsa autori ka qëlluar me një armë me silenciator.
Ai është afruar qetësisht te shënjestra, që ndodhej në prani të dy miqve të tij, e ka përshëndetur, pastaj i ka dalë nga pas dhe e ka qëlluar.
Kamerat kanë fiksuar momentin, ku personi i dyshuar si vrasës me pagesë, është i maskuar dhe mban një kapele.
Burime nga grupi hetimor bëjnë të ditur se kamera e lokalit nuk ka mundur të fiksojë ngjarjen, për shkak se rrezja e saj pengohej nga çadrat e hapura, apo tendat, në pjesën e jashtme të lokalit.
Gjithsesi mësohet se nga pamjet e mbledhura nga kamerat në zonë, është bërë e mundur të fiksohet autori, por jo të identifikohet.
Dyshimet janë se ai ose ka pasur njohuri të plotë mbi zonën, duke iu shmangur me sa më shumë mundësi kamerave, ose kemi të bëjmë me një vrasës profesionist, që është përdorur në rastin e ekzekutimit të avokatit.
Burimet bëjnë me dije se grupi hetimor po përpunon pamjet e gjetura, për të përcaktuar detaje mbi autorin, që më pas mund të çojnë në krijimin e një identikiti. Ky hap, sipas burimeve, mund të çojë në identifikimin e një autori të dyshuar.
Gjithsesi dyshimet më të mëdha janë se në rastin e vrasjes së avokatit 50 vjeçar, autori i krimit nuk është banor i qytetit.
Autori, pas krimit është larguar qetësisht, dhe dyshohet se ai është ndihmuar nga një tjetër person, që ka bërë transportin me një automjet, që është gjetur i djegur pranë Bradasheshit. Automjeti i është nënshtruar ekspertizës dhe nga të dhënat është zbuluar se ai ishte vjedhur në 2018 në zonën e Fushë-Krujës.
Dy çështjet më të rëndësishme që 50-vjeçari ka mbrojtur në vendin tonë lidhen me fisin Çapja në Elbasan si dhe Emiljano Shullazin në Tiranë. Përveç Shqipërisë, Gurra ushtronte profesionin e avokatit dhe në Angli, ku kishte themeluar zyrën e quajtur “Gurra & D”, ku kryesisht merrej me çështje të emigrantë shqiptarë në vendin ishullor.
Ravik Gurra ishte i diplomuar për Drejtësi në Universitetin e Tiranës. Në vitin 1998, 50-vjeçari emigroi në Britaninë e Madhe ku u zhvendos bashkë me familjen. Në Angli, Gurra mësohet se ka punuar si përkthyes në Gjykata, Ministrinë e Emigracionit dhe Polici. Gurra, gjithashtu, ka studiuar për Avokati dhe në Britani, ku edhe kishte hapur një studio ligjore. /BN/
