Nga Boldnews.al
Ndërkombëtarët e Tiranës pritet t’i bëjnë sërish apel “ndërgjegjes dhe patriotizmit” të prokurorëve të shkallës së parë, të cilët refuzuan në total pjesëmarrjen në garën e hapur për një vend të lirë në Këshillin e Lartë të Prokurorisë, për shkak se ata nuk kanë besim tek procesi i Vetingut, i cili, për shumë prej tyre, është “i korruptuar politikisht”.
Më shumë se dy javë më parë, Prokurorja e Përgjithshme (e Përkohshme), Arta Marku, shpalli thirrjen për prokurorët e nivelit bazë për të kandiduar për postin e mbetur vakant në KLP, pasi Kolegji i Posaçëm i Apelimit shkarkoi Antoneta Sevdarin, për shkak të problemeve me pasurinë.
Afati për aplikime përfundoi në mesin e javës që lamë pas. Burime nga organi qëndror i Akuzës deklaruan për “Boldnews.al” se, deri në datën e fundit të aplikimeve, në 21 Mars, kishte kandiduar vetëm një prokuror për vendin vakant.
Vatë Staka, prokurori i Shkodrës, i cili kandidoi edhe më parë për të qenë anëtar në Këshillin e Lartë të Prokurorisë, është i vetmi që i është përgjigjur thirrjes së ish-koleges së tij dhe sot titullares, Arta Marku.
Ndërkohë, asnjë prej rreth 130 prokurorëve të tjerë të shkallës së parë nuk e ka parë të arsyeshme për të kandiduar. Shumica absolute e tyre nuk kanë aplikuar, pasi nuk dëshirojnë që të përballen së shpejti me procesin e Vetingut.
Ligji parashikon që kandidatët për Këshillin e Lartë të Prokurorisë të kalojnë me përparësi në procesin e Vetingut. Pikërisht ky element duket se i ka stepur ata për të kandiduar.
Mënyra se si është zhvilluar procesi i Vetingut deri më tani, ka krijuar dyshime tek prokurorët, por edhe gjyqtarët se “nuk respektohen standarte normale dhe të njëjta”. Shumë prej zyrtarëve të sistemit të drejtësisë kanë krijuar bindjen se kalimi i procesit të Vetingut është në varësi të vullnetit të eksponentëve të rëndësishëm të maxhorancës politike.
Në këto kushte, prokurorët e shkallës së parë e kanë vlerësuar të mos kandidojnë për në Këshillin e Lartë të Prokurorisë, me qëllim që t’i shmangen procesit të shpejtë të Vetingut.
Nga mënyra se si e ka organizuar punën Komisioni i Pavarur i Kualifikimit, prokurorët e nivelit bazë do të jenë të fundit në radhë që do të përballen me procesin e rivlerësimit kalimtar.
Këshilli i Lartë i Prokurorisë aktualisht ka një vend vakant, pas shkarkimit të prokurores së Tiranës, Antoneta Sevdari. Ligji për organet e sistemit të drejtësisë parashikon që vakanca në KLP do të zëvendësohet nga një kandidat që vjen nga i njëjti nivel prokurorie që ka qenë anëtari i larguar.
Në zbatim të detyrimit ligjor, Kryeprokurorja e Përkohshme Arta Marku, shpalli thirrjen për të aplikuar për kandidaturat e reja në dt 6 Mars 2019. Në përfundim të afatit 15-ditor, sipas burimeve, ka kanduar vetëm prokurori Vatë Staka, i cili e ka kaluar Vetingun disa muaj më parë.
Arta Marku tashmë ka dy opsione: Të thërrasë Mbledhjen e Përgjithshme të Prokurorëve për të votuar vetëm emrin e Vatë Stakës; ose, të rishpall thirrjen për kandidatë të rinj. Varianti i dytë është më i mundshëm, pasi gara vetëm me një kandidat do të jetë fiktive dhe kosto e lartë për të gjithë prokurorët, të cilët do të duhet të mblidhen nga e gjithë Shqipëria për të votuar vetëm një emër.
Kjo situatë nuk është e re për institucionin e Prokurorisë. Në procedurën e parë, nga e cila u zgjodh KLP-ja që është aktualisht në detyrë, mungonte një kandidat nga prokuroritë në nivel Apeli.
Misionet ndërkombëtare që përdorin fondet e vendeve të tyre për të qëndruar në Tiranë, në atë kohë u bën thirrje “ndërgjegjes, integritetit dhe patriotizimit” të prokurorëve shqiptarë për të marrë pjesë në atë garë.
Asaj thirrjeje iu përgjigj vetëm prokurori i Apelit të Krimeve të Rënda, Bujar Sheshi, i cili, siç rezultoi më pas nga Autoriteti i Dosjeve, rezultonte të ishte bashkëpunëtor i ish-Sigurimit të Shtetit.
Në garën për vendin vakant në KLP, siç duket, nuk kanë marrë pjesë as ish-kandidatët e procedurës së mëparshme, prokurorët e Krimeve të Rënda, Besnik Muçi e Dritan Prençi.
Muçi e Prençi kanë aplikuar për të qenë pjesë e Strukturës së Posaçme Hetimore (SPAK) dhe nuk rezulton të kenë shprehur sërish dëshirën për të qenë pjesë e Këshillit të Lartë të Prokurorisë.
