Orges Shehi nuk mban më. Trajneri i Skënderbeut është shfaqur i revoltuar në fund të miqësores së djeshme. Dhe më shumë se rezultati, ajo që e ka zhgënjyer është mungesa e impenjimit. Në prononcimin e dhënë për gazetën “Panorama Sport”, veç të tjerash durrsaku i stolit korçar ka evidentuar sjelljen amatore të disa lojtarëve. “Ishte një miqësore për të mbushur me ndeshje këtë javë pushimi që kishim, si pasojë e grumbullimit të Kombëtares.
Por duket se nuk jemi aq të pjekur sa duhet dhe eksperienca është ajo që ne na mundon shumë. E them këtë, pasi në testin e sotëm (djeshëm) kam parë sjellje prej amatorësh nga disa lojtarë. Unë nuk i duroj dot sjellje të tilla dhe mosimpenjimi është armiku im i madh. Prandaj kam bërë ndryshime shumë herët në formacion, sepse lojtarët nuk më përgjigjeshin ashtu si doja unë. Ne i organizojmë këto miqësore për të marrë përgjigjet e duhura edhe ne si staf, por dikush zgjedh të mos impenjohet dhe kjo është e papranueshme. Ishte një test që do të shikonim se deri ku jemi me përgatitjet dhe është në vazhdën e kampionatit. Tani e kuptuam se ku çalon mungesa e vijimësisë në rezultate”, tha fillimisht tekniku.
I pyetur për gjendjen e Shqiprim Taipit, ai shpjegoi: “Lojtari ka një problem fizik, por shpresoj që të kthehet shpejt në ekip. Është pajisur me pasaportën Shqiptare dhe është një plus i madh për ne, pasi ul numrin e të huajve në grup”. Në fund, nuk kishte si të mos jepte një koment edhe për Sabjen Lilajn, i cili duket se do të rikthehet në Korçë. “Lilaj? Nuk dua të flas për merkaton, pasi po mendojmë deri në fund të sezonit për të qenë brenda objektivave. Lilaj është një nga ata futbollistë që derën e klubit e kanë gjithnjë të hapur, prandaj komentet janë pa vend”, mbylli prononcimin e tij Orges Shehi.
