Arta Dade, ish-depute dhe ish-ministre e PS-së, ka rrëfyer shkakun se përse nuk ishte pjesë e Kongresit të Partisë Socialiste që u mbajt ditën e djeshme.
“S’më ka ftuar njeri, ndaj nuk isha në kongres. Unë në 2017 kam qenë delegate e Kolonjës, pra kam qenë në kongresin e 2017. Nuk di tani nëse janë bërë zgjedhje të reja të delegatëve të kongresit.
Normalisht, nga organizimi nuk më ka marrë askush në telefon për të marrë mandatin. Unë nuk di të jenë bërë zgjedhje të reja për delegatë të rinj”, tha ajo.
Por, edhe nëse do të kishte zgjedhje të reja delegatësh për të cilët zonja Dade nuk është e informuar, sërish ka munguar një ftesë për ish-ministren e Jashtme të Partisë Socialiste, sot një zë kritik për disa aspekte të qeverisë “Rama”, shkruan Newsbomb.
“Nëse kanë bërë zgjedhje të delegatëve të rinj, nuk më është bërë asnjë ftesë për të qenë prezent në kongres.
Mendoj se kjo është e qëllimshme, sepse nga PS kanë bërë ftesa dhe për personazhe që kanë qënë të largët dhe jo kontribuues në PS. Kështu që nuk më kanë kontaktuar në asnjë rrethanë”, thotë Dade .
