Nënkryetari i PD-së, Edmond Spaho, dhe ish-deputeti Klevis Balliu, reaguan ndaj vendimit të Gjykatës Penale në Tiranë, që vendosi lënien në burg të 3 prej 6 të arrestuarve pas protestës së 21 marsit para Kuvendit të Shqipërisë.
Në një prononcim për mediat, Spaho tha se vendimi për të lënë në burg 3 nga të arrestuarit ishte pa prova dhe fakte.
“Shqipëria është ndoshta i vetmi vend në Europë që burgos kur proteston për të drejtat e tua. Qëllimi i prokurorisë dhe gjykatës është të dalë në mbrojtje të mazhorancës me synim se do të trembë protestuesit në protestat e ardhshme që do të organizohen kundër kësaj qeverie dhe Edi Ramës.
Por janë të pashpresë në këto përpjekje që bëjnë sepse kur qytetarët përplasen me qeverinë fituesit janë qytetarët. Kështu do të ndodhë edhe me këtë mazhorancë dhe Edi Ramën, i cili shpejt do ta lërë karrigen e pushtetit”, tha Spaho.
Ndërkohë, Klevis Balliu, referuar Dorian Protoduarit, një prej protestuesve që do të qëndrojë në burg, tha se ai ka qenë me një nga kameramanët.
“Nuk ka qenë fare te pjesa ku pati shtyrje me policinë. Akt i turpshëm politik që i kthen këto gjykata në ambjente të PS, nuk mund të quhen gjykata. Edi Rama i shpalli sot “luftë” Unazës së Re me këtë vendim të turpshëm ndaj Dorian Protoduarit dhe ne ashtu do të përgjigjemi.
Do të të ndjekim se je në kafe, se je në restorant, se je në takime dhe protestojmë ndaj teje. Po deshe na fut në burg të gjithëve se edhe po na fute në burg, protesta do të vazhdojë dhe nga burgu. Nuk do të na ndalësh dot”, tha Balliu.
Gjykata ka lënë në burg Mariglen Doçin, Dorian Protoduarin dhe Emiljan Mustafa. Ndërkohë Jurgen Gjikola, Bledar Dollia dhe Arbër Kola u lanë në “arrest shtëpie.
