Kemi parë dhe dëgjuar shumë histori dashurie që kanë një fund të lumtur, por ka dhe raste kur edhe pse dy njerëz duhen shumë, pas disa viteve ndahen. Kjo jo si pasojë e xhelozisë ose të problemeve të tjera që mund të lindin midis tyre, por për shkak të pamundësisë për t’u bërë prindër. E tillë ishte historia e Rajmondës që u trajtua natën e sotme në programin “Dua të të bëj të lumtur”.
Rajmonda ishte njohur me një djalë dhe kishte bashkëjetuar për 5 vite me rradhë. Pas shumë përpjekjeve ajo nuk kishte mundur që të bëhej nënë. Për këtë arsye në çift kishin filluar zënkat dhe debatet duke sjellë ndarjen e tyre. Pas një periudhë kohore, ajo mëson që ishte shtatzanë dhe se do të sillte në jetë një djalë.
Rajmonda i ishte drejtuar programit “Dua të të bëj të lumtur” për të falenderuar nënën, Bukurien e cila nuk e braktisi, por e mbështeti për të sjellë në jetë dhe për të rritur e vetme djalin e saj, pavarësisht mentalitetit dhe fjalëve të njerëzve. “Dua të të them të faleminderit për çdo gjë që ke bërë për mua. Tani që jam nënë vetë arrij të kuptoj të gjithë sakrificat që ke bërë. Kur të gjithë të tjerët ishin kundër, ti më mbështete për të sjellë në jetë djalin tim”.
Gjatë bisedës që u zhvillua në studio, Bukurija rrëfeu vështirësitë që kishte kaluar për të qëndruar me Rajmondën. Sipas saj më shumë vrisnin fjalët që të tjerët thonin, por falë ndihmës së familjarëve, ajo i’a kishte dalë mbanë. E ftuara surprizë për Bukurijen ishte një ndër ikonat e kinematograifsë shqiptare, aktorja e mirënjohur, Rajmonda Bulku. TCH
