Ravik Gurra, avokat i njohur jo vetëm në qytetin e Elbasanit, u ekzekutua mbrëmjen e së premtes, në një lokal në qendër të qytetit.
Avokati ishte në ambientet e lokalit, ulur në një tavolinë me dy persona të tjerë, njëri prej të cilëve jurist në një institucion shtetëror, kur u qëllua nga një person me një armë me silenciator.
Nga raportimet mësohet se autori ishte i maskuar dhe është larguar nga vendi i ngjarjes me një automjet që e priste, diku pranë.
Pak minuta më vonë, në periferi të qytetit të Elbasanit është gjetur një makinë e djegur për të cilën dyshohet se është përdorur në ngjarjen e sotme.
Viktima jetonte në qytetin e Elbasanit me nënën e tij, ndërsa ishte i divorcuar. Nga marrja në pyetje e personave të afërt të avokatit, grupi hetimor nuk ka mundur të mbledhë shumë të dhëna që mund të çojnë në zbulimin e arsyes së krimit, pasi rezulton nga dëshmitë e mbledhura se ai nuk ka pasur kërcënime apo konflikte.
Në kushte të tilla, grupi hetimor duket se do të përqëndrohet në pistën e krimit për shkak të detyrës. Prokurorët që kanë marrë në dorë hetimet janë Enkeleda Millonai dhe Petref Asllani, ndërsa një grup me specialistë të Krimeve të Rënda kanë udhëtuar drejt qytetit të Elbasanit.
Gjithashtu kreu i policisë Ardi Veliu ka udhëtuar drejt Elbasanit pas ngjarjes së rëndë.
Pas ngjarjes së rëndë ka reaguar edhe Dhoma e Avokatisë që drejtohet nga Maks Haxhia.
Ai shprehet i tronditur, ndërsa i kërkon policisë të vendosë para drejtësisë autorët.
“Dhoma e Avokatise te Shqiperise, nepermjet mediave u vu ne dijeni te vrasjes me arme zjarri te Avokat Ravik Gurra, antar i Dhomes te Avokatis Tirane, ajo e tronditur thelle nga kjo ngjarrje, me shqetesim dhe indinjate te thelle ju kerkon organeve ligjzbatuese duke i dhene perparesi gjetjes dhe venies para pergjegjesise te autoreve te kesaj vepre e cila vjen e behet cdo dite me prezente ne kerkcenim te jetes dhe shendetit ndaj avokateve, veprime qe kane marre pershkallzim ne rritje ndaj profesionit sa te nderua aq edhe fisnik te avokatit”, deklaron Dhoma e Avokatisë.
