Ashure është një ëmbëlsirë me origjinë turke por që në Shqipëri është shumë e njohur. Kjo lloj ëmbëlsirë është e përgatitur kryesisht me drithëra, fruta të thata e arra. Nuk ekziston një recetë e mirëlltë për përgatitjen e ashures, mund të variojë nga krahina në krahinë e nga familja në familje. Në vendin tonë kjo ëmbëlsirë është e përgatitur kryesisht me grurë e ne po japim këtë recetë.
Përbërësit për Embëlsirë me grurë – Ashure
Përbërësit për 6 persona
- 500 gr grurë për ashure
- 1 L ujë
- 250 gr sheqer
- 3 lugë niseshte
- pak kripë
- 250 gr bajame, arra, lajthi
- pak kanellë pluhur
- 100 gr rrush i thatë
Përgatitja
Si fillim shpëlajmë grurin në ujë të rrjedhshëm dhe e hedhim në një tenxhere të ziejë së bashku me rreth 1L ujë. Sapo të fillojë të ziejë, ulim zjarrin dhe e lemë të ziejë ngadalë derisa gruri të jetë zbutur. Në këtë moment i hedhim sheqerin dhe e trazojmë mirë. E lemë të ziejë edhe përreth 15 minuta. Më pas në një enë hedhim niseshtenë dhe e hollojmë me pak ujë. E shtojmë niseshtenë në tenxheren me grurë e trazojmë mirë dhe e lemë të ziejë për disa minuta derisa të trashet lëngu. Në këtë moment, ashurja është gati dhe hedhim në kupa të vogla.
Sipër kupave i spërkasim me kanellë pluhur e bajame, arra ose lajthi të shtypura,( sipas dëshirës). Mund ti shtojmë sipër edhe rrushin e thatë të cilin e kemi zbutur paraprakisht në një enë me ujë të ftohtë. Pasi ashurja të jetë ftohur komplet e shërbejmë të shoqëruar me një gotë liker të ftohtë.
Ju bëftë mirë!
